Библия на церковно-славянском языке - транслитерация современным русским алфавитом
(1751)

Книга Судей

◄◄ | ◄ | Глава ⚫ | ► | ►►

¹ И воспе Деввора и Варак сын Авинеемов в той день, и рече:

² внегда начати вождом во Израили, и в произволении людий, благословите Господа.

³ Услышите, царие, и внушите, князи: аз Господеви воспою и пою Богу Израилеву.

⁴ Господи, во исходе Твоем от Сиира, внегда воздвизатися Тебе от села Едомова, земля потрясеся, и небо возмутися, и облацы искапаша воду:

⁵ горы подвигошася от лица Господа Елои, тая Сина от лица Господа Бога Израилева.

⁶ Во дни Самегара сына Анафова, во дни Иаили, оскудеша путие, и идоша в пути кривы, и идоша в пути развращенны:

⁷ оскудеша жнвущии во Израили, оскудеша дондеже воста Деввора, дондеже воста мати во Израили:

⁸ избраша боги новы, яко хлеб ячен, тогда воеваша грады князей: щит не явися, ниже копие в четыредесяти тысящах во Израили.

⁹ Сердце мое на учиненная во Израили: сильнии людий, благословите Господа.

¹⁰ Ездящии на ослятех белых в полудне, и седящии на судищи, и ходящии на пути сонмов, провещайте.

¹¹ Глас плещущих посреде веселящихся: тамо дадят правду. Господи, правды укрепи во Израили: тогда разыдошася во грады своя людие Господни.

¹² Востани, востани, Деввора: востани, востани, глаголи с песнию: востани, Вараче, и плени плен твой, сыне Авинеемль.

¹³ Тогда возвеличися сила Его: Господь смири мне крепльшыя мене.

¹⁴ Людие Ефремли утомиша их в долине: брат твой Вениамин в людех твоих: от мене Махир снидоша взыскующии, и от Завулона укрепляющиися в скиптре повествования писменника.

¹⁵ И началницы во Иссахаре с Девворою и Вараком: тако Варак отпусти пеших своих в долину, в разделения Рувимова, велика испытания сердца.

¹⁶ Вскую ми седиши посреде мосфафемов, слышати звиздание воставающих проити в разделения Рувимля? Велия испытания сердца.

¹⁷ Галаад, об ону страну Иордана вселися: и Дан, вскую обитаеши в кораблех? Асир обита при брезех морских, и в разделениих своих вселися.

¹⁸ Завулон, людие укориша душу свою на смерть: и Неффалим на высотах села.

¹⁹ И приидоша к нему царие, и ополчишася, тогда воеваша царие Ханаанстии во Фанаахе, у воды Магеддо: множества сребра не взяша.

²⁰ От небесе ополчишася звезды, от чина своего ополчишася с Сисарою.

²¹ Водотечь Кисонов изверже их, водотечь Кадимин, водотечь Кисонов: поперет его душа моя сильная.

²² Тогда отсекошася копыта конская от топтания сильных его.

²³ Проклинайте Мазора, рече Ангел Господень, проклятием проклените живущих в нем, яко не приидоша в помощь Господню, в помощь (Господню) в сильных.

²⁴ Да благословится в женах Иаиль, жена Хавера Кинеева, от жен в кущи да благословится:

²⁵ воды проси у нея, и даде ему млеко в чаши: преимущих принесе масло кравие:

²⁶ руку свою левую к колу простре, и десницу свою ко млату работающих, и уби Сисару: разби главу его, и порази, прободе скрания его:

²⁷ между ногама ея повалися: паде утружден, и умре посреде ног ея, и тамо паде бедне.

²⁸ Оконцем взираше мати Сисарина, окном сквозе решетку, что замедли колесница его приити? Вскую умедлиша стопы колесниц его?

²⁹ Мудрии началствующии ея отвещаша ей, и сама отвещаваше словеса своя себе:

³⁰ не обрящут ли его разделяюща корысти, удружающа другом на главу мужа сильна? Корысти шаров Сисаре, корысти шаров различия, шары испещренных, сия выи его корысти.

³¹ Тако да погибнут вси врази Твои, Господи: и любящии Его, якоже восток солнца в силе своей.

³² И бысть в покои земля четыредесять лет.