Библия на церковно-славянском языке - транслитерация современным русским алфавитом
(1751)

Книга Судей

◄◄ | ◄ | Глава ⚫ | ► | ►►

¹ И бысть по днех во дни жатвы пшеницы, и посети Сампсон жену свою, несый козлище от коз, и рече: да вниду к жене моей в ложницу. И не даде ему отец ея внити.

² И рече отец ея, глаголя: рех, яко ненавидя возненавидел еси ю, и отдах ю единому от другов твоих: не се ли сестра ея меншая добрейши ея есть? Да будет тебе ныне вместо ея.

³ И рече ему Сампсон: чист есмь ныне от Филистимлян, яко сотворю аз с ними зло.

⁴ И пойде Сампсон, и ят триста лисиц, и взя свещы, и связа ошиб ко ошибу, и устрои едину свещу между двема ошибома:

⁵ и разжже огнь в свещах, и пусти я в нивы Филистимски: и запали нивы от гумен и даже до класов простых и до винограда и масличия.

⁶ И рекоша иноплеменницы: кто сотвори сия? И рекоша: Сампсон зять Фамнафеев, яко взя жену его и даде ю единому от другов его. И взыдоша иноплеменницы и сожгоша ю и дом отца ея огнем.

⁷ И рече им Сампсон: аще и сотвористе вы тако ей, аз не благоизволю, но отмщение мое единому комуждо вас сотворю, и посем почию.

⁸ И порази их голени до бедр язвою велиею: и сниде, и вселися у водотечи в пещере камене Итама.

⁹ И изыдоша Филистимляне, и ополчишася во Иуде, и разсеяшася в Лехи.

¹⁰ И рече им всяк муж Иудин: почто приидосте на ны? И рекоша иноплеменницы: связати Сампсона приидохом и сотворити ему, якоже сотвори нам.

¹¹ И снидоша три тысящы мужей от Иуды к пещере камене Итама и рекоша к Сампсону: не веси ли, яко владеют нами Филистимляне? И вскую сия сотворил еси нам? И рече им Сампсон: якоже ми сотвориша, тако сотворих им.

¹² И рекоша ему: связати тебе приидохом и предати тя в руце иноплеменником. И рече им Сампсон: кленитеся мне, да не убиете мене вы.

¹³ И рекоша ему, глаголюще: ни, но токмо соузом свяжем тя и предадим тя в руки их, смертию же не умертвим тебе. И связаша его двема ужы новыми и изведоша его от камене того.

¹⁴ И той прииде до Челюсти: иноплеменницы же воскликнуша и текоша противу ему. И сниде на него Дух Господень, и быша ужя на мышцах его яко изгребие, егда зажжется огнем: и разрешишася узы его от руку его:

¹⁵ и обрете челюсть ослю повержену, и простре руку свою, и взя ю: и изби ею тысящу мужей.

¹⁶ И рече Сампсон: челюстию ослею потребляя потребих их, яко челюстию ослею избих тысящу мужей.

¹⁷ И бысть егда преста глаголя, и поверже челюсть от руки своея: и нарече место тое Избиение Челюстное.

¹⁸ И возжажда зело, и возопи ко Господу, и рече: Ты благоволил еси в руце раба Твоего спасение великое сие, и ныне умираю жаждею, и впаду в руки необрезанных.

¹⁹ И разверзе Бог язву на Челюсти, и изыде из нея вода, и пи: и возвратися дух его, и оживе: сего ради прозвася имя ей Источник призывающаго, иже есть в Челюсти, даже до дне сего.

²⁰ И суди Израилю во дни Филистимлян двадесять лет.