Библия на церковно-славянском языке - транслитерация современным русским алфавитом
(1751)

Книга Судей

◄◄ | ◄ | Глава ⚫ | ► | ►►

¹ И воста по Авимелесе спасти Израиля Фола сын Фуи, сын брата отца его, муж от Иссахара: и сей живяше в Самире в горе Ефремове,

² и суди Израиля лет двадесять три, и умре, и погребен быти в Самире.

³ И воста по нем Иаир Галаадитин, и суди Израиля лет двадесять два:

⁴ и быша ему сынове тридесять два ездящии на тридесяти двух ослех: и грады им тридесять два: и прозываху их грады Иаировы, даже до днесь, иже суть в земли Галаадове:

⁵ и умре Иаир, и погребен бысть в Камоне.

⁶ И приложиша сынове Израилевы творити злое пред Господем и послужиша Ваалимам и Астарофам и богом Сирским и богом Сидонским и богом Моавлским и богом сынов Аммоних и богом иноплеменников: и оставиша Господа и не работаша Ему.

⁷ И разгневася Господь яростию на Израиля и предаде их в руку Филистимску и в руку сынов Аммоних.

⁸ И озлобиша, и сокрушиша сынов Израилевых в то время осмьнадесять лет, всех сынов Израилевых, иже об ону страну Иордана в земли Аморреа иже в Галааде.

⁹ И преидоша сынове Аммони Иордан воевати на Иуду и Вениамина и на дом Ефремов: и оскорблени быша сынове Израилевы зело.

¹⁰ И возопиша сынове Израилевы ко Господу, глаголюще: согрешихом Тебе, яко оставихом Бога нашего и работахом Ваалиму.

¹¹ И рече Господь к сыном Израилевым: не от Египта ли и от Аморреа и от сынов Аммоних и от Филистима

¹² и от Сидонян и от Амалика и от Мадиама, иже стужиша вам, и возописте ко Мне, и спасох вы от руки их?

¹³ Вы же остависте Мене и работасте богом иным: сего ради не приложу спасти вас:

¹⁴ идите и возопийте к богом, ихже избрасте себе, и тии да спасут вы во время скорби вашея.

¹⁵ И реша сынове Израилевы ко Господу: согрешихом, сотвори ты нам по всему, елико угодно пред очима Твоима: точию избави нас в сей день.

¹⁶ И извергоша боги чуждыя от среды себе и послужиша Господеви единому: и сжалеся душа Его о утруждении Израилеве.

¹⁷ И взыдоша сынове Аммони, и ополчишася в Галааде: и собрашася и сынове Израилевы, и ополчишася в Массифе.

¹⁸ И реша людие князи Галаадстии кийждо ко ближнему своему: муж, иже начнет битися с сынми Аммоновыми, той будет князь всем живущым в Галааде.