Библия на церковно-славянском языке - транслитерация современным русским алфавитом
(1751)

Первое послание Иоанна

◄◄ | ◄ | Глава ⚫ | ► | ►►

¹ Всяк веруяй, яко Иисус есть Христос, от Бога рожден есть: и всяк любяй Рождшаго любит и Рожденнаго от Него.

² О сем вемы, яко любим чада Божия, егда Бога любим и заповеди Его соблюдаем.

³ Сия бо есть любы Божия, да заповеди Его соблюдаем: и заповеди Его тяжки не суть.

⁴ Яко всяк рожденный от Бога побеждает мир: и сия есть победа, победившая мир, вера наша.

⁵ Кто есть побеждаяй мир, токмо веруяй, яко Иисус есть Сын Божий?

⁶ Сей есть пришедый водою и кровию и Духом, Иисус Христос, не водою точию, но водою и кровию: и Дух есть свидетелствуяй, яко Дух есть истина.

⁷ Яко трие суть свидетелствующии на небеси, Отец, Слово и Святый Дух: и Сии три едино суть.

⁸ И трие суть свидетелствующии на земли, дух и вода и кровь: и трие во едино суть.

⁹ Аще свидетелство человеческое приемлем, свидетелство Божие более есть: яко сие есть свидетелство Божие, еже свидетелствова о Сыне Своем.

¹⁰ Веруяй в Сына Божия имать свидетелство в себе: не веруяй Богови лжа сотворил есть Его, яко не верова во свидетелство, еже свидетелствова Бог о Сыне Своем.

¹¹ И сие есть свидетелство, яко живот вечный дал есть нам Бог, и сей живот в Сыне Его есть.

¹² Имеяй Сына Божия имать живот: а не имеяй Сына Божия живота не имать.

¹³ Сия писах вам верующым во имя Сына Божия, да весте, яко живот вечный имате, и да веруете во имя Сына Божия.

¹⁴ И сие есть дерзновение, еже имамы к Нему, яко аще чесо просим по воли Его, послушает нас:

¹⁵ и аще вемы, яко послушает нас, еже аще просим, вемы, яко имамы прошения, ихже просихом от Него.

¹⁶ Аще кто узрит брата своего согрешающа грех не к смерти, да просит, и даст ему живот, согрешающым не к смерти. Есть грех к смерти: не о том, глаголю, да молится.

¹⁷ Всяка неправда грех есть, и есть грех не к смерти.

¹⁸ Вемы, яко всяк рожденный от Бога не согрешает: но рожденный от Бога блюдет себе, и лукавый не прикасается ему.

¹⁹ Вемы, яко от Бога есмы, и мир весь во зле лежит.

²⁰ Вемы же, яко Сын Божий прииде и дал есть нам (свет и) разум, да познаем Бога истиннаго и да будем во истиннем Сыне Его Иисусе Христе: Сей есть истинный Бог и живот вечный.

²¹ Чадца, храните себе от треб идолских. Аминь.