Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Iаана

◄◄ | ◄ | Глава ⚫ | ► | ►►

¹ А на трэці дзень было вяселле ў Кане Галілейскай, i Маці Іісусава была там.

² Запрошаны таксама быў Іісус i вучні Яго на вяселле.

³ I калі не хапіла віна, Маці Іісусава кажа Яму: віна не маюць.

⁴ Кажа ёй Іісус: што Мне i Табе, Жанчына? яшчэ не прыйшоў час Мой.

⁵ Кажа Яго Маці слугам: што скажа Ён вам, зрабіце.

⁶ Было ж там шэсць каменных пасудзін для вады, якія стаялі дзеля ачышчэння Іудзейскага і змяшчалі па дзве ці па тры меры.

⁷ Кажа ім Іісус: напоўніце пасудзіны вадою. I напоўнілі iх да верху.

⁸ I кажа ім: цяпер чэрпайце i нясіце да распарадчыка застолля. I яны панеслі.

⁹ Kалi ж распарадчык пакаштаваў вады, што зрабілася віном, - а ён не ведаў, адкуль яно, ведалі толькі слугі, якія налівалі ваду, - кліча жаніха распарадчык застолля

¹⁰ i кажа яму: кожны чалавек спачатку добрае віно падае, а калі нап’юцца, тады горшае; ты ж добрае віно захаваў дагэтуль.

¹¹ Так паклаў Іісус пачатак цудам у Кане Галілейскай i явіў славу Сваю, i ўверавалі ў Яго вучні Яго.

¹² Пасля гэтага прыйшоў Ён у Капернаум, Сам i Мацi Яго, i браты Яго, i вучні Яго, i там заставаліся некалькі дзён.

¹³ І набліжалася Пасха Іудзейская, і прыйшоў Іісус у Іерусалім

¹⁴ i знайшоў, што ў храме прадавалі валоў і авечак, і галубоў, i сядзелі мянялы грошай;

¹⁵ і, зрабiўшы біч з вяровак, усiх выгнаў з храма, і авечак, i валоў, і парассыпаў грошы мянялаў i сталы перавярнуў;

¹⁶ i прадаўцам галубоў сказаў: забярыце гэта адсюль, не рабіце дом Айца Майго домам гандлю.

¹⁷ I ўспомнілі вучні Яго, што напісана: "клопат пра дом Твой паглынае Мяне".

¹⁸ На гэта Іудзеі сказалі Яму: якім знаменнем Ты пакажаш нам, што маеш права гэта рабіць?

¹⁹ У адказ Іісус сказаў ім: разбурыце храм гэты, i Я за тры дні ўзвяду яго.

²⁰ І сказалі Іудзеі: сорак шэсць гадоў будаваўся храм гэты, а Ты за тры дні ўзвядзеш яго?

²¹ Ён жа гаварыў пра храм цела Свайго.

²² Калі ж Ён уваскрэс з мёртвых, успомнілі вучні Яго, што Ён гэта казаў, і паверылі Пісанню і слову, якое сказаў Іісус.

²³ А калі Ён быў у Іерусаліме на свята Пасхі, многія ўверавалі ў імя Яго, бачачы цуды, якія Ён тварыў.

²⁴ Але Сам Іісус не давяраўся ім, таму што Сам ведаў усiх,

²⁵ i не меў патрэбы, каб хто сведчыў пра чалавека, бо Сам ведаў, што было ў чалавеку.