Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Iаана

◄◄ | ◄ | Глава ⚫ | ► | ►►

¹ Гэта сказаў Я вам, каб вы не спакусіліся;

² адлучаць вас ад сінагог; Надыходзіць нават час, калi кожны, хто будзе забіваць вас, будзе думаць, што ён служыць Богу;

³ і так будуць рабiць, бо не спазналi нi Айца, нi Мяне.

⁴ Але гэта сказаў Я вам, каб вы, калi прыйдзе час, згадалі тое, што Я гаварыў вам; спачатку ж гэтага Я вам не гаварыў, бо з вамi быў;

⁵ а цяпер іду да Таго, Хто паслаў Мяне, i нiхто з вас не пытаецца ў Мяне: куды ідзеш?

⁶ Але ад таго, што Я сказаў вам гэта, смутак напоўнiў сэрцы вашы.

⁷ Але Я ісціну кажу вам: лепш для вас, каб Я пайшоў; бо, калi Я не пайду, Уцяшыцель не прыйдзе да вас; калi ж пайду, то пашлю Яго да вас,

⁸ і, прыйшоўшы, Ён пакажа свету, у чым грэх, і праўда, i суд:

⁹ грэх жа ў тым, што не веруюць у Мяне;

¹⁰ а праўда ў тым, што Я іду да Айца Майго, i ўжо не ўбачыце Мяне;

¹¹ а суд у тым, што князь свету гэтага асуджаны.

¹² Яшчэ многае маю сказаць вам, але вы не здолееце ўспрыняць цяпер;

¹³ калi ж прыйдзе Ён, Дух ісціны, то наставіць вас на ўсю ісціну, бо Ён не ад Сябе гаварыць будзе, а тое, што пачуе, будзе гаварыць, i будучыню абвесцiць вам;

¹⁴ Ён Мяне праславiць, бо з Майго возьме i абвесцiць вам;

¹⁵ Усё, што мае Айцец, - Маё; таму Я сказаў, што з Майго возьме i абвесцiць вам;

¹⁶ яшчэ трохі, і не ўбачыце Мяне; i зноў трохі, і ўбачыце Мяне, бо Я іду да Айца.

¹⁷ Гаварылі ж некаторыя з вучняў Яго мiж сабою: што гэта Ён кажа нам: "яшчэ трохі, і не ўбачыце Мяне; i зноў трохі, і ўбачыце Мяне" і "Я іду да Айца"?

¹⁸ I гаварылi: што гэта значыць, што Ён кажа: "яшчэ трохі"? не ведаем, што Ён гаворыць.

¹⁹ Ведаў Іісус, што хочуць спытацца ў Яго, i сказаў iм: вы пра тое пытаецеся адзiн у аднаго, што Я сказаў: "яшчэ трохі, і не ўбачыце Мяне, i зноў трохі, і ўбачыце Мяне"?

²⁰ праўду, праўду кажу вам, што будзеце плакаць i галасіць вы, а свет будзе радавацца; вы смуткаваць будзеце, але смутак ваш у радасць абернецца;

²¹ жанчына, калi нараджае, гаруе, бо прыйшла гадзiна яе, а калi народзiць дзiця, то ўжо не памятае гора ад радасцi, бо нарадзiўся чалавек на свет;

²² так i вы смутак цяпер маеце, але Я зноў убачу вас, i ўзрадуецца сэрца ваша, i радасцi вашай нiхто не адыме ў вас;

²³ і ў той дзень не будзеце пытацца ў Мяне нi пра што; Праўду, праўду кажу вам: чаго ні папросiце Айца ў iмя Маё, Ён дасць вам;

²⁴ дагэтуль вы не прасiлi нiчога ў iмя Маё; прасiце i атрымаеце, каб радасць ваша была поўная;

²⁵ гэта ў прытчах Я гаварыў вам; але надыходзiць час, калi ўжо не ў прытчах буду гаварыць, а адкрыта пра Айца абвяшчу вам;

²⁶ у той дзень у iмя Маё будзеце прасiць, i не кажу вам, што Я буду маліць Айца за вас,

²⁷ бо Сам Айцец любiць вас, таму што вы Мяне ўзлюбiлi i ўверавалi, што Я ад Бога выйшаў;

²⁸ Я выйшаў ад Айца i прыйшоў у свет; i зноў пакiдаю свет і іду да Айца.

²⁹ Кажуць Яму вучнi Яго: вось цяпер Ты адкрыта гаворыш і прытчы ніякай не расказваеш;

³⁰ цяпер ведаем, што Ты ведаеш усё i не маеш патрэбы, каб хто ў Цябе пытаўся; таму веруем, што Ты ад Бога выйшаў.

³¹ Адказаў iм Іісус: цяпер веруеце?

³² вось надыходзiць час, і ўжо настаў, калi вы рассеецеся кожны ў свой бок i Мяне пакiнеце аднаго; але Я не адзiн, бо Айцец са Мною;

³³ гэта сказаў Я вам, каб вы ўва Мне мiр мелi; у свеце гора зазнаеце, але мужайцеся: Я перамог свет.