Библия на церковно-славянском языке - транслитерация современным русским алфавитом
(1751)

Евангелие от Иоанна

◄◄ | ◄ | Глава ⚫ | ► | ►►

¹ Аз есмь лоза истинная, и Отец Мой делатель есть:

² всяку розгу о Мне не творящую плода, измет ю: и всяку творящую плод, отребит ю, да множайший плод принесет.

³ Уже вы чисти есте за слово, еже глаголах вам.

⁴ Будите во Мне, и Аз в вас. Якоже розга не может плода сотворити о себе, аще не будет на лозе, тако и вы, аще во Мне не пребудете.

⁵ Аз есмь лоза, вы (же) рождие: (и) иже будет во Мне, и Аз в нем, той сотворит плод мног, яко без Мене не можете творити ничесоже:

⁶ аще кто во Мне не пребудет, извержется вон, якоже розга, и изсышет: и собирают ю и во огнь влагают, и сгарает:

⁷ аще пребудете во Мне и глаголголы Мои в вас пребудут, егоже аще хощете, просите, и будет вам:

⁸ о сем прославися Отец Мой, да плод мног сотворите и будете Мои учениицы.

⁹ Якоже возлюби Мя Отец, и Аз возлюбих вас: будите в любви Моей:

¹⁰ аще заповеди Моя соблюдете, пребудете в любви Моей, якоже Аз заповеди Отца Моего соблюдох и пребываю в Его любви.

¹¹ Сия глаголах вам, да радость Моя в вас будет и радость ваша исполнится.

¹² Сия есть заповедь Моя, да любите друг друга, якоже возлюбих вы:

¹³ болши сея любве никтоже имать, да кто душу свою положит за други своя.

¹⁴ Вы друзи Мои есте, аще творите, елика Аз заповедаю вам:

¹⁵ не ктому вас глаголю рабы, яко раб не весть, что творит господь его: вас же рекох други, яко вся, яже слышах от Отца Моего, сказах вам.

¹⁶ Не вы Мене избрасте, но Аз избрах вас и положих вас, да вы идете и плод принесете, и плод ваш пребудет, да, егоже аще просите от Отца во имя Мое, даст вам.

¹⁷ Сия заповедаю вам, да любите друг друга.

¹⁸ Аще мир вас ненавидит, ведите, яко Мене прежде вас возненавиде:

¹⁹ аще от мира бысте были, мир убо свое любил бы: якоже от мира несте, но Аз избрах вы от мира, сего ради ненавидит вас мир.

²⁰ Поминайте слово, еже Аз рех вам: несть раб болий господа своего: аще Мене изгнаша, и вас изженут: аще слово Мое соблюдоша, и ваше соблюдут:

²¹ но сия вся творят вам за имя Мое, яко не ведят Пославшаго Мя.

²² Аще не бых пришел и глаголал им, греха не быша имели: ныне же вины не имут о гресе своем:

²³ ненавидяй Мене, и Отца Моего ненавидит:

²⁴ аще дел не бых сотворил в них, ихже ин никтоже сотвори, греха не быша имели: ныне же и видеша, и возненавидеша Мене и Отца Моего:

²⁵ но да сбудется слово, писанное в законе их, яко возненавидеша Мя туне.

²⁶ Егда же приидет Утешитель, Егоже Аз послю вам от Отца, Дух истины, Иже от Отца исходит, Той свидетелствует о Мне:

²⁷ и вы же свидетелствуете, яко искони со Мною есте.