Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Iаана

◄◄ | ◄ | Глава ⚫ | ► | ►►

¹ Праўду, праўду кажу вам: хто не праз дзверы ўваходзiць у двор авечы, а ўлазiць iнакш, той злодзей i разбойнiк;

² а хто ўваходзiць праз дзверы, той пастух авечак;

³ яму прыдзвернiк адчыняе, i авечкi голасу яго слухаюцца, i сваiх авечак ён клiча па імёнах i выводзiць iх;

⁴ i калi сваiх авечак выпусціць, iдзе перад iмi, i авечкi за iм ідуць, бо ведаюць голас яго;

⁵ за чужым жа не пойдуць, а будуць уцякаць ад яго, бо не ведаюць чужога голасу.

⁶ Гэтую прытчу сказаў iм Іісус. Яны ж не зразумелi значэння таго, што Ён гаварыў iм.

⁷ Тады зноў сказаў iм Іісус: праўду, праўду кажу вам: Я - дзверы для авечак;

⁸ усе, колькi iх нi прыходзiла перада Мною, былі зладзеi ды разбойнiкi; але авечкi не паслухалiся iх;

⁹ Я - дзверы; хто ўвойдзе праз Мяне, збаўлены будзе; i ўвойдзе, i выйдзе, i пашу знойдзе;

¹⁰ злодзей прыходзiць толькi каб украсцi і забiць, i загубiць; Я прыйшоў, каб жыццё мелi, i ўдосталь мелi;

¹¹ Я - Пастыр добры; пастыр добры жыццё сваё аддае за авечак,

¹² а наймiт, якi не пастыр і якому авечкi не свае, бачыць, як прыходзіць воўк, i пакiдае авечак i ўцякае, i воўк хапае авечак i разганяе іх;

¹³ а наймiт уцякае, бо ён наймiт i не дбае пра авечак.

¹⁴ Я - Пастыр добры i ведаю Маіх, i Мае ведаюць Мяне;

¹⁵ як ведае Мяне Айцец, так i Я ведаю Айца, i жыццё Маё аддаю за авечак;

¹⁶ ёсць у Мяне i iншыя авечкі, якія не з гэтага двара, i тых Мне трэба прывесцi; i голас Мой яны пачуюць, і будзе адно стада i адзiн Пастыр.

¹⁷ За тое Айцец Мяне любiць, што Я аддаю жыццё Маё, каб зноў прыняць яго;

¹⁸ нiхто не адбірае яго ў Мяне, а Я аддаю яго Сам; уладу маю аддаць яго i ўладу маю зноў прыняць яго; гэтую запаведзь атрымаў Я ад Айца Майго.

¹⁹ І нязгода зноў узнікла памiж Іудзе-ямі з-за гэтых слоў;

²⁰ гаварылi многiя з iх: Ён мае ў Сабе дэмана i шалее; чаго вы Яго слухаеце?

²¹ Іншыя гаварылі: гэта словы не апантанага, хіба можа дэман адкрываць вочы сляпым?

²² I настала ў Іерусалiме свята аднаўлення, i была зiма;

²³ і хадзiў Іісус у храме, у прытворы Саламонавым.

²⁴ Абступiлi Яго Іудзеі i казалi Яму: дакуль Ты будзеш таміць душы нашы? калi Ты Хрыстос, скажы нам адкрыта.

²⁵ Адказаў iм Іісус: Я сказаў вам, i вы не верыце; справы, якія Я раблю ў iмя Айца Майго, яны сведчаць пра Мяне;

²⁶ але вы не верыце, бо вы не з авечак Маіх, як Я сказаў вам;

²⁷ Авечкi Мае голасу Майго слухаюцца, i Я ведаю iх, i яны iдуць за Мною,

²⁸ і Я жыццё вечнае даю iм, i не загiнуць давеку, i не вырве iх нiхто з рукi Маёй;

²⁹ Айцец Мой, Якi даў Мне iх, большы за ўсiх, i нiхто не можа вырваць iх з рукi Айца Майго;

³⁰ Я i Айцец - адно.

³¹ І ўзялі зноў камянямі Іудзеі, каб пабiць Яго.

³² Сказаў iм Іісус: многа добрых спраў паказаў Я вам ад Айца Майго; за якую з гэтых спраў вы хочаце пабіць Мяне камянямі?

³³ Адказалi Яму Іудзеі, гаворачы: не за добрую справу мы хочам пабiць Цябе камянямі, а за блюзнерства і за тое, што Ты, будучы чалавекам, робiш Сябе Богам.

³⁴ Адказаў iм Іісус: хiба не напiсана ў законе вашым: "Я сказаў: вы багi".

³⁵ Калі Ён назваў багамi тых, да каго было звернута слова Божае, а Пісанне не можа быць парушана,

³⁶ тады як жа Таму, Каго Айцец асвяцiў i паслаў у свет, вы кажаце: "блюзнерыш", паколькі Я сказаў: "Я Сын Божы"?

³⁷ калi Я не раблю спраў Айца Майго, не верце Мне;

³⁸ а калi раблю, то, калі Мне не верыце, дык справам верце, каб вы спазналi i ўверавалi, што Айцец ува Мне i Я ў Ім.

³⁹ Тады шукалi зноў, як схапіць Яго, але Ён унік рук iх

⁴⁰ i пайшоў зноў за Іардан, на тое месца, дзе раней хрысцiў Іаан, i застаўся там.

⁴¹ I многiя прыйшлi да Яго i гаварылі, што Іаан не зрабiў нiякага цуду;

⁴² I многiя там уверавалi ў Яго.