Библия на церковно-славянском языке - транслитерация современным русским алфавитом
(1751)

Книга пророка Иоиля

◄◄ | ◄ | Глава ⚫ | ► | ►►

¹ Вострубите трубою в Сионе, проповедите в горе Моей святей, и да смятутся вси живущии на земли, яко предстоит день Господень, яко близ,

² день тмы и бури, день облака и мглы: якоже утро разлиются по горам людие мнози и крепцы, подобни им не быша от века, и по них не приложится до лет в род и род:

³ яже пред ним огнь потребляяй, и яже за ним возгараяся пламень: якоже рай Сладости земля пред лицем его, и яже созади его поле пагубы, и спасающагося не будет им:

⁴ якоже вид конский вид их, и якоже конницы, тако проженут:

⁵ якоже глас колесниц на верхи гор востекут, и яко глас пламене огненна попаляюща тростие, и яко людие мнози и крепцы воополчающиися на брань.

⁶ От лица их сокрушатся людие: всякое лице аки опаление горнца.

⁷ Якоже борцы потекут, и якоже мужие храбри взыдут на ограды: и кийждо в путь свой пойдет, и не совратят путий своих,

⁸ и кийждо от брата своего не отступит: отягощени оружии своими пойдут и в стрелах своих падут, но не скончаются.

⁹ Града имутся, и на забрала востекут, и на храмины взлезут, и оконцами внидут, якоже татие.

¹⁰ Пред лицем его смятется земля и потрясется небо: солнце и луна померкнут, и звезды угасят свет свой.

¹¹ И Господь даст глас Свой пред лицем силы Своея, яко мног есть зело полк Его, яко крепка дела словес Его: зане велик день Господень, велик и светел зело, и кто будет доволен ему?

¹² И ныне глаголет Господь Бог ваш: обратитеся ко Мне всем сердцем вашим в посте и в плачи и в рыдании,

¹³ и расторгните сердца ваша, а не ризы ваша, и обратитеся ко Господу Богу вашему, яко милостив и щедр есть, долготерпелив и многомилостив и раскаявайся о злобах.

¹⁴ Кто весть, обратится ли, и раскается, и оставит за собою благословение и жертву и возлияние Господу Богу вашему?

¹⁵ Вострубите трубою в Сионе, освятите пост, проповедите цельбу,

¹⁶ соберите люди, освятите церковь, изберите старейшины, совокупите младенцы ссущия сосцы: да изыдет жених от ложа своего, и невеста от чертога своего.

¹⁷ Между степеньми жертвенника восплачутся жерцы служащии Господу и рекут: пощади, Господи, люди Твоя и не даждь достояния Твоего на укоризну, да не обладают ими языцы, да не рекут во языцех: где есть Бог их?

¹⁸ И возревнова Господь о земли Своей и пощаде люди Своя.

¹⁹ И отвеща Господь людем Своим и рече: се, Аз вам послю пшеницу и вино и масло древяное, и насытитеся их, и не дам вас ксему на поругание во языцех:

²⁰ и сущаго от севера отжену от вас и отрину его на землю безводную, и погублю лице его в мори первем и задняя его в мори последнем, и взыдет гнилость его, и взыдет смрад его, яко возвеличи дела своя.

²¹ Дерзай, земле, радуйся и веселися, яко возвеличи Господь, еже сотворити.

²² Дерзайте, скоти польстии, яко прозябнуша поля пустыни, яко древо принесе плод свой, виноград и смокви даша силу свою.

²³ И чада Сионя, радуйтеся и веселитеся о Господе Бозе вашем, яко даде вам пищу в правду и одождит вам дождь ранний и поздный, якоже и прежде:

²⁴ и наполнятся гумна ваша пшеницы, и преизлиются точила вином и елеем.

²⁵ И воздам вам вместо лет, в няже поядоша прузи и мшица, и сиплеве и гусеницы, сила Моя великая, юже послах на вы:

²⁶ и снесте ядуще и насытитеся, и похвалите имя Господа Бога вашего, Яже сотвори с вами чудеса: и не посрамятся людие Мои во век.

²⁷ И уведите, яко посреде Израиля Аз есмь, и Аз Господь Бог ваш, и несть иного разве Мене: и не посрамятся ктому людие Мои во век.

²⁸ И будет по сих, и излию от Духа Моего на всяку плоть, и прорекут сынове ваши и дщери ваша, и старцы ваши сония узрят, и юноты ваши видения увидят:

²⁹ ибо на рабы Моя и на рабыни Моя во дни оны излию от Духа Моего:

³⁰ и дам чудеса на небеси и на земли, кровь и огнь и курение дыма:

³¹ солнце обратится во тму, и луна в кровь, прежде неже приити дню Господню великому и просвещенному:

³² и будет, всяк иже призовет имя Господне, спасется: яко в горе Сионе и во Иерусалиме будет спасаемый, якоже рече Господь, и благовествуемии, ихже Господь призва.