Библия на церковно-славянском языке - транслитерация современным русским алфавитом
(1751)

Книга Иова

◄◄ | ◄ | Глава ⚫ | ► | ►►

¹ Отвещав же Иов, рече:

² аще бы кто веся извесил гнев мой, болезни же моя взял бы на мерило вкупе,

³ то песка морскаго тяжчайшии были бы: но, якоже мнится, словеса моя зла суть.

⁴ Стрелы бо Господни в теле моем суть, ихже ярость испивает кровь мою: егда начну глаголати, бодут мя.

⁵ Что бо? Еда вотще возревет дивий осел, разве брашна прося? Или возревет гласом вол, в яслех имеяй брашно?

⁶ Снестся ли хлеб без соли? Или есть вкус во тщих словесех?

⁷ Не может бо утишитися душа моя: смрад бо зрю брашна моя, якоже воню львову.

⁸ Аще бо дал бы, да приидет прошение мое, и надежду мою дал бы Господь.

⁹ Начен Господь да уязвляет мя, до конца же да не убиет мя.

¹⁰ Буди же ми град гроб, на егоже стенах скаках в нем: не пощажу: не солгах бо во словесех святых Бога моего.

¹¹ Кая бо крепость моя, яко терплю? Или кое ми время, яко терпит моя душа?

¹² Еда крепость камения крепость моя? Или плоти моя суть медяны?

¹³ Или не уповах на него? Помощь же от мене отступи,

¹⁴ отречеся от мене милость, посещение же Господне презре мя.

¹⁵ Не воззреша на мя ближнии мои: якоже поток оскудеваяй, или якоже волны преидоша мя:

¹⁶ иже мене бояхуся, ныне нападоша на мя:

¹⁷ якоже снег или лед смерзлый, егда истает теплоте бывшей, не ктому познавается, что бе:

¹⁸ тако и аз оставлен есмь от всех, погибох же и бездомок бых:

¹⁹ видите пути Феманския, на стези Савонския смотрящии,

²⁰ и студа исполнени будут на грады и на имения надеющиися.

²¹ Ныне же и вы наидосте на мя немилостивно: убо видевше мой струп убойтеся.

²² Что бо? Еда что у вас просих, или вашея крепости требую,

²³ да спасете мя от врагов, или из руки сильных избавите мя?

²⁴ Научите мя, аз же умолчу: аще что погреших, скажите ми.

²⁵ Но, якоже мнится, зла (суть) мужа истиннаго словеса, не от вас бо крепости прошу:

²⁶ ниже обличение ваше словесы мя утолит, ниже бо вещания вашего словес стерплю.

²⁷ Обаче яко на сира нападаете, наскачете же на друга вашего.

²⁸ Ныне же воззрев на лица ваша, не солжу.

²⁹ Сядите ныне, и да не будет неправедно, и паки ко праведному снидитеся.

³⁰ Ибо несть в языце моем неправды, и гортань мой не разуму ли поучается?