Библия на церковно-славянском языке - транслитерация современным русским алфавитом
(1751)

Книга Иова

◄◄ | ◄ | Глава ⚫ | ► | ►►

¹ Не видел ли еси его, и глаголемым не удивился ли еси? Не убоялся ли еси, яко уготовася Ми? Кто бо есть противляяйся Мне, или кто противостанет Ми и стерпит,

² аще вся поднебесная Моя есть?

³ Не умолчу его ради и словом силы помилую равнаго ему.

⁴ Кто открыет лице облечения его, в согбение же персей его кто внидет?

⁵ Двери лица его кто отверзет? Окрест зубов его страх,

⁶ утроба его щиты медяны, союз же его якоже смирит камень,

⁷ един ко другому прилипают, дух же не пройдет его:

⁸ яко муж брату своему прилепится, содержатся и не отторгнутся.

⁹ В чхании его возблистает свет: очи же его видение денницы.

¹⁰ Из уст его исходят аки свещы горящыя, и размещутся аки искры огненныя:

¹¹ из ноздрей его исходит дым пещи горящия огнем углия:

¹² душа же его яко углие, и яко пламы из яст его исходит..

¹³ На выи же его водворяется сила, пред ним течет пагуба.

¹⁴ Плоти же телесе его сольпнушася: лиет нань, и не подвижится.

¹⁵ Сердце его ожесте аки камень, стоит же аки наковальня неподвижна.

¹⁶ Обращшуся же ему, страх зверем четвероногим по земли скачущым.

¹⁷ Аще срящут его копия, ничтоже сотворят ему, копие вонзено и броня:

¹⁸ вменяет бо железо аки плевы, медь же аки древо гнило:

¹⁹ не уязвит его лук медян, мнит бо каменометную пращу аки сено:

²⁰ аки стеблие вменишася ему млатове, ругаетжеся трусу огненосному.

²¹ Ложе его остни острии, всяко же злато морское под ним, якоже брение безчисленно.

²² Возжизает бездну, якоже пещь медяну: мнит же море яко мироварницу

²³ и тартар бездны якоже пленника: вменил бездну в прохождение.

²⁴ Ничтоже есть на земли подобно ему сотворено, поругано быти Ангелы Моими:

²⁵ все высокое зрит: сам же царь всем сущым в водах.