Сборник священных книг иудаизма - הסֵפֵרים (hа-сэфэрим) или תנך (танах)
(XIII-V века до н.э.)

אִיּוֹב («Ийóб» - Иов)

◄◄ | ◄ | Глава ⚫ | ► | ►►

¹ וַיַּעַן אֱלִיהוּ, וַיֹּאמַר׃

² הֲזֹאת חָשַׁבְתָּ לְמִשְׁפָּט; אָמַרְתָּ, צִדְקִי מֵאֵל׃

³ כִּי־תֹאמַר מַה־יִּסְכָּן־לָךְ; מָה־אֹעִיל, מֵחַטָּאתִי׃

⁴ אֲנִי אֲשִׁיבְךָ מִלִּין; וְאֶת־רֵעֶיךָ עִמָּךְ׃

⁵ הַבֵּט שָׁמַיִם וּרְאֵה; וְשׁוּר שְׁחָקִים, גָּבְהוּ מִמֶּךָּ׃

⁶ אִם־חָטָאתָ מַה־תִּפְעָל־בּוֹ; וְרַבּוּ פְשָׁעֶיךָ, מַה־תַּעֲשֶׂה־לּוֹ׃

⁷ אִם־צָדַקְתָּ מַה־תִּתֶּן־לוֹ; אוֹ מַה־מִיָּדְךָ יִקָּח׃

⁸ לְאִישׁ־כָּמוֹךָ רִשְׁעֶךָ; וּלְבֶן־אָדָם, צִדְקָתֶךָ׃

⁹ מֵרֹב עֲשׁוּקִים יַזְעִיקוּ; יְשַׁוְּעוּ מִזְּרוֹעַ רַבִּים׃

¹⁰ וְלֹא־אָמַר, אַיֵּה אֱלוֹהַּ עֹשָׂי; נֹתֵן זְמִרוֹת בַּלָּיְלָה׃

¹¹ מַלְּפֵנוּ מִבַּהֲמוֹת אָרֶץ; וּמֵעוֹף הַשָּׁמַיִם יְחַכְּמֵנוּ׃

¹² שָׁם יִצְעֲקוּ וְלֹא יַעֲנֶה; מִפְּנֵי, גְּאוֹן רָעִים׃

¹³ אַךְ־שָׁוְא לֹא־יִשְׁמַע אֵל; וְשַׁדַּי, לֹא יְשׁוּרֶנָּה׃

¹⁴ אַף כִּי־תֹאמַר לֹא תְשׁוּרֶנּוּ; דִּין לְפָנָיו, וּתְחוֹלֵל לוֹ׃

¹⁵ וְעַתָּה, כִּי־אַיִן פָּקַד אַפּוֹ; וְלֹא־יָדַע בַּפַּשׁ מְאֹד׃

¹⁶ וְאִיּוֹב הֶבֶל יִפְצֶה־פִּיהוּ; בִּבְלִי־דַעַת, מִלִּין יַכְבִּר׃    פ