Библия на церковно-славянском языке - транслитерация современным русским алфавитом
(1751)

Книга Иова

◄◄ | ◄ | Глава ⚫ | ► | ►►

¹ Посем отверзе Иов уста своя и прокля день свой,

² глаголя:

³ да погибнет день, в оньже родихся, и нощь оная, в нюже реша: се, мужеск пол:

⁴ та нощь буди тма, и да не взыщет ея Господь свыше, ниже да приидет на ню свет,

⁵ и да приимет ю тма и сень смертная, да приидет на ню сумрак: проклят буди день той

⁶ и нощь оная: да постигнет ю тма, да не будет во днех лета, ниже да вчислится во днех месяцей:

⁷ но нощь оная да будет болезнь, и да не приидет на ню веселие и радость,

⁸ но да прокленет ю проклинаяй той день, иже имать одолети великаго кита:

⁹ да померкнут звезды тоя нощи, да ожидает и на свет да не приидет, и да не видит денницы возсиявающия,

¹⁰ яко не затвори врат чрева матере моея: отяла бо бы болезнь от очию моею:

¹¹ почто бо во утробе не умрох? Из чрева же изшед, и абие не погибох?

¹² Почто же мя прияша на колена? Почто же ссах сосца?

¹³ Ныне убо уснув умолчал бых, уснув же почил бых

¹⁴ со царьми и советники земли, иже хваляхуся оружии,

¹⁵ или со князи, имже много злата, иже наполниша домы своя сребра,

¹⁶ или якоже изверг излазяй из ложесн матерних, или якоже младенцы, иже не видеша света:

¹⁷ тамо нечестивии утолиша ярость гнева, тамо почиша претружденнии телом,

¹⁸ вкупе же в веце сем бывшии не слышат гласа собирающаго дань:

¹⁹ мал и велик тамо есть, и раб не бояйся господина своего:

²⁰ почто бо дан есть сущым в горести свет и сущым в болезнех душам живот,

²¹ иже желают смерти и не получают, ищуще якоже сокровища,

²² обрадовани же бывают, аще улучат (смерть)?

²³ Смерть бо мужу покой, егоже путь сокровен есть, затвори бо Бог окрест его:

²⁴ прежде бо брашен моих воздыхание ми приходит, слезю же аз одержимь страхом,

²⁵ страх бо, егоже ужасахся, прииде ми, и егоже бояхся, срете мя:

²⁶ ни умирихся, ниже умолчах, ниже почих, и найде ми гнев.