Библия на церковно-славянском языке - транслитерация современным русским алфавитом
(1751)

Книга Иова

◄◄ | ◄ | Глава ⚫ | ► | ►►

¹ Отвещав же Иов, рече:

² доколе притрудну творите душу мою и низлагаете мя словесы? Уразумейте токмо, яко Господь сотвори мя сице.

³ Клевещете на мя, не стыдящеся мене належите ми.

⁴ Буди, яко воистинну аз прельстихся, и у мене водворяется погрешение, глаголати словеса, яже не подобаше, словеса же моя погрешают, и не во время:

⁵ буди же, яко на мя величаетеся, наскакаете же ми поношением:

⁶ разумейте убо, яко Господь есть иже смяте мя и ограду Свою на мя вознесе.

⁷ Се, смеюся поношению, не возглаголю: возопию, и нигдеже суд.

⁸ Окрест огражден есмь и не могу прейти: пред лицем моим тму положи,

⁹ славу же с мене совлече и отя венец от главы моея:

¹⁰ растерза мя окрест, и отидох: посече же яко древо надежду мою.

¹¹ Люте же гнева употреби на мя и возмне мя яко врага.

¹² Вкупе же приидоша искушения Его на мя, на путех же моих обыдоша мя наветницы.

¹³ Братия моя отступиша от мене, познаша чуждих паче мене, и друзие мои немилостиви быша:

¹⁴ не снабдеша мя ближнии мои, и ведящии имя мое забыша мя.

¹⁵ Соседи дому и рабыни моя, (яко) иноплеменник бых пред ними:

¹⁶ раба моего звах, и не послуша, уста же моя моляхуся:

¹⁷ и просих жену мою, призывах же лаская сыны подложниц моих:

¹⁸ они же мене в век отринуша, егда востану, на мя глаголют.

¹⁹ Гнушахуся мене видящии мя, и ихже любих, восташа на мя.

²⁰ В кожи моей согниша плоти моя, кости же моя в зубех содержатся.

²¹ Помилуйте мя, помилуйте мя, о, друзие! Рука бо Господня коснувшаяся ми есть.

²² Почто мя гоните якоже и Господь? От плотей же моих не насыщаетеся?

²³ Кто бо дал бы, да напишутся словеса моя, и положатся оная в книзе во век?

²⁴ И на дщице железне и олове, или на камениих изваяются?

²⁵ Вем бо, яко присносущен есть, иже имать искупити мя,

²⁶ (и) на земли воскресити кожу мою терпящую сия, от Господа бо ми сия совершишася,

²⁷ яже аз в себе свем, яже очи мои видеста, а не ин: вся же ми совершишася в недре.

²⁸ Аще же и речете: что речем противу ему? И корень словесе обрящем в нем.

²⁹ Убойтеся же и вы от меча: ярость бо на беззаконныя найдет, и тогда увидят, где есть их вещество.