Библия на церковно-славянском языке - транслитерация современным русским алфавитом
(1751)

Книга Иова

◄◄ | ◄ | Глава ⚫ | ► | ►►

¹ Тлею духом носимь, прошу же гроба и не улучаю.

² Молю болезнуя, и что сотворю? Украдоша же ми имение чуждии.

³ Кто есть сей? Рукою моею связан да будет.

⁴ Яко сердце их сокрыл еси от мудрости, сего ради да не вознесеши их.

⁵ Части возвестит злобы: очи же на сынех истаяста.

⁶ Положил же мя еси в притчу во языцех, смех же бых им.

⁷ Ослепоста бо от гнева очи мои, повоеван бых вельми от всех:

⁸ чудо объя истинных о сем, праведник же на беззаконника да востанет:

⁹ да содержит же верный путь свой, чистый же рукама да приимет дерзость.

¹⁰ Но обаче вси належите и приидите, не бо обретаю в вас истины.

¹¹ Дние мои преидоша в течении, расторгошася же удове сердца моего.

¹² Нощь в день преложих: свет близ от лица тмы.

¹³ Аще бо стерплю, ад ми есть дом, в сумраце же постлася ми постеля.

¹⁴ Смерть назвах отца моего быти, матерь же и сестру ми гной.

¹⁵ Где убо еще есть ми надежда, или благая моя узрю?

¹⁶ Или со мною во ад снидут, или вкупе в персть снидем.