Библия на церковно-славянском языке - транслитерация современным русским алфавитом
(1751)

Книга Иова

◄◄ | ◄ | Глава ⚫ | ► | ►►

¹ Труждаюся душею моею, стеня испущу на мя глаголы моя, возглаголю горестию души моея одержимь

² и реку ко Господеви: не учи мя нечествовати, и почто ми сице судил еси?

³ Или добро Ти есть, аще вознеправдую, яко презрел еси дела руку Твоею, совету же нечестивых внял еси?

⁴ Или якоже человек видит, видиши? Или якоже зрит человек, узриши?

⁵ Или житие Твое человеческо есть? Или лета Твоя яко дние мужа?

⁶ Яко истязал еси беззаконие мое и грехи моя изследил еси.

⁷ Веси бо, яко не нечествовах: но кто есть изимаяй из руку Твоею?

⁸ Руце Твои сотвористе мя и создасте мя: потом же преложив, поразил мя еси.

⁹ Помяни, яко брение мя создал еси, в землю же паки возвращаеши мя.

¹⁰ Или не якоже млеко измелзил мя еси, усырил же мя еси равно сыру?

¹¹ Кожею же и плотию мя облекл еси, костьми же и жилами сшил мя еси:

¹² живот же и милость положил еси у мене, посещение же Твое сохрани мой дух.

¹³ Сия имеяй в Тебе, вем, яко вся можеши, и невозможно Тебе ничтоже.

¹⁴ Аще бо согрешу, храниши мя, от беззакония же не безвинна мя сотворил еси.

¹⁵ Аще бо нечестив буду, люте мне, аще же буду праведен, не могу возникнути: исполнен бо есмь безчестия,

¹⁶ ловимь бо есмь аки лев на убиение: паки же преложив, люте убиваеши мя.

¹⁷ Обновляяй на мя испытание мое, гнева бо великаго на мя употребил еси и навел еси на мя искушения.

¹⁸ Почто убо мя из чрева извел еси, и не умрох, око же мене не видело бы,

¹⁹ и бых бы аки не был? Почто убо из чрева во гроб не снидох?

²⁰ Или не мало есть время жизни моея? Остави мене почити мало,

²¹ прежде даже отиду, отнюдуже не возвращуся, в землю темну и мрачну,

²² в землю тмы вечныя, идеже несть света, ниже видети живота человеческаго.