Библия на церковно-славянском языке - транслитерация современным русским алфавитом
(1751)

Книга пророка Исайи

◄◄ | ◄ | Глава ⚫ | ► | ►►

¹ И рече Господь ко мне: приими себе свиток нов велик и напиши в нем писалом человечим, еже скоро пленение сотворити корыстей, приспе бо:

² и свидетели мне сотвори верны человеки, Урию иереа и Захарию сына Варахиина.

³ И приступих ко пророчице, и во чреве зачат и роди сына. И рече Господь мне: нарцы имя ему: скоро плени, нагло расхити,

⁴ зане прежде неже разумети отрочати назвати отца или матерь, приимет силу Дамаскову, и корысти Самарийския пред царем Ассирийским.

⁵ И приложи Господь глаголати ко мне еще, глаголя:

⁶ понеже не восхотеша людие сии воды Силоамли текущия тисе, но восхотеша имети Рассона и сына Ромелиева царя над вами,

⁷ сего ради се, возводит Господь на вы воду реки сильну и многу, царя Ассирийска и славу его: и взыдет на всяку дебрь вашу, и обыдет всяку стену вашу,

⁸ и отимет от Иудеи человека, иже возможет главу воздвигнути, или могущаго что совершити: и будет полк его, во еже наполнити ширину страны Твоея, с нами Бог!

⁹ Разумейте, языцы, и покаряйтеся, услышите даже до последних земли: могущии, покаряйтеся: аще бо паки возможете, паки побеждени будете,

¹⁰ и иже аще совет совещаете, разорит Господь, и слово, еже аще возглаголете, не пребудет в вас, яко с нами Бог.

¹¹ Тако глаголет Господь: крепкою рукою не покаряются хождению пути людий сих, глаголюще:

¹² да не когда рекут: жестоко: все бо, еже аще рекут людие сии, жестоко есть: страха же их не убойтеся, ниже возмятитеся.

¹³ Господа Сил, Того освятите, и Той будет тебе в страх.

¹⁴ И аще будеши уповая на Него, будет тебе во освящение, а не якоже о камень претыкания преткнешися, ниже яко о камень падения: домове же Иаковли в пругле, и в раздолии седящии во Иерусалиме.

¹⁵ Сего ради изнемогут в них мнози, и падут, и сокрушатся, и приближатся, и яти будут человецы в твердыни суще.

¹⁶ Тогда явлени будут печатлеющии закон, еже не учитися.

¹⁷ И речет: пожду Бога отвращшаго лице Свое от дому Иаковля и уповая буду Нань.

¹⁸ Се, аз и дети, яже ми даде Бог: и будут знамения и чудеса в дому Израилеве от Господа Саваофа, иже обитает на горе Сион.

¹⁹ И аще рекут к вам: изыщите чревоволшебников и от земли возглашающих, тщесловующих, иже от чрева глашают, не язык ли к Богу своему взыщет? Что испытуют мертвыя о живых?

²⁰ Закон бо в помощь даде, да рекут не якоже слово сие, заньже не леть дары даяти.

²¹ И приидет на вы жесток глад, и будет, егда взалчете, скорбни будете и зло речете князю и отечеству:

²² и воззрят на небо горе, и на землю низу призрят, и се, скудость тесна и тма, скорбь и теснота и тма, якоже не видети: и не оскудеет в тесноте сый даже до времене.