Библия на церковно-славянском языке - транслитерация современным русским алфавитом
(1751)

Книга пророка Исайи

◄◄ | ◄ | Глава ⚫ | ► | ►►

¹ И бысть во дни Ахаза сына Иоафамля, сына Озии, царя Иудина, взыде Расин царь Арамль, и Факей сын Ромелиев, царь Израилев, на Иерусалим, воевати на него, и не возмогоша разорити его.

² И возвестися в дому Давидове, глаголя: совещася Арам со Ефремом, и ужасеся душа его и душа людий его, якоже в дубраве древо ветром возколеблется.

³ И рече Господь ко Исаии: изыди во сретение Ахазу ты и оставыйся Иасув сын твой, к купели горняго пути села белилнича,

⁴ и речеши ему: блюди, еже молчати, и не бойся, ниже душа твоя да изнеможет от двою древу главень дымящихся сих: егда бо гнев ярости Моея будет, паки изцелю.

⁵ Сын же Арамль и сын Ромелиев яко совещаста совет лукавый на тя, глаголюще:

⁶ взыдем во Иудею, и собеседовавше с ними отвратим я к нам и воцарим в ней сына Тавеилева:

⁷ сия же глаголет Господь Саваоф: не пребудет совет сей, ниже сбудется,

⁸ но глава Араму Дамаск, и глава Дамаску Расин: но еще шестьдесят и пять леть, оскудеет царство Ефремово от людий,

⁹ глава же Ефремови Соморон, и глава Соморону сын Ромелиев: и аще не уверите, ниже имате разумети.

¹⁰ И приложи Господь глаголати ко Ахазу, рекий:

¹¹ проси себе знамения от Господа Бога твоего во глубину, или в высоту.

¹² И рече Ахаз: не имам просити, ниже искушу Господа.

¹³ И рече (Исаиа): слышите убо, доме Давидов: еда мало вам есть труд даяти человеком, и како даете Господеви труд?

¹⁴ Сего ради даст Господь Сам вам знамение: се, Дева во чреве зачнет и родит Сына, и наречеши имя Ему Еммануил:

¹⁵ масло и мед снесть, прежде неже разумети ему изволити злая, или избрати благое:

¹⁶ зане прежде неже разумети отрочати благое или злое, отринет лукавое, еже избрати благое, и оставится земля, еяже ты боишися, от лица двух царей.

¹⁷ Но наведет Господь на тя и на люди твоя и на дом отца твоего дни, иже еще не пришли, от дне в оньже отя Ефрема от Иуды, царя Ассирийска.

¹⁸ И будет в той день, позвиждет Господь мухам, яже владеют частию реки Египетския, и пчеле, яже есть во стране Ассирийстей:

¹⁹ и приидут вси и почиют в дебрех страны и в пещерах каменных, и во вертепех и во всяцей разселине и во всяцем древе.

²⁰ В день оный обриет Господь бритвою наятою об ону страну реки царя Ассирийска, главу и власы ног, и браду отимет.

²¹ И будет в той день, кормити будет человек юницу от волов и две овце:

²² и будет от множества творения млечнаго, масло и мед снесть всяк оставыйся на земли.

²³ И будет в той день, всяко место, идеже аще будет тысяща лоз винограда, по тысящи сикль, в лядину будет и в терние:

²⁴ со стрелою и луком внидут тамо, яко лядиною и тернием будет вся земля:

²⁵ и всяка гора оремая возорется, не найдет тамо страх: будет от лядины и от терния в паству овцам и в попрание волу.