Библия на церковно-славянском языке - транслитерация современным русским алфавитом
(1751)

Книга пророка Исайи

◄◄ | ◄ | Глава ⚫ | ► | ►►

¹ И ныне сице глаголет Господь Бог сотворивый тя, Иакове, и создавый тя, Израилю: не бойся, яко избавих тя, прозвах тя именем твоим: Мой еси ты.

² И аще преходиши сквозе воду, с тобою есмь, и реки не покрыют тебе: и аще скозе огнь пройдеши, не сожжешися, и пламень не опалит тебе,

³ яко Аз Господь Бог твой, Святый Израилев, Спасаяй тя: сотворих премену твою Египет и Ефиопию, и Соину за тя.

⁴ Отнелиже честен был еси предо Мною, прославился еси, и Аз тя возлюбих, и дам человеки за тебе и князи за главу твою.

⁵ Не бойся, яко с тобою есмь: от восток приведу семя твое и от запад соберу тя:

⁶ реку северу: приведи: и ливу: не возбраняй, приведи сыны Моя от земли дальния и дщери Моя от краев земных,

⁷ всех, елицы нарицаются именем Моим: во славе бо Моей устроих его и создах его и сотворих и.

⁸ И изведох люди слепы, и очи суть такожде слепы, и глуси ушы имущии.

⁹ Вси языцы собрашася вкупе, и соберутся князи от них. Кто возвестит сия? Или яже исперва кто возвестит вам? Да приведут свидетели своя и оправдятся, и да услышат и да рекут истину.

¹⁰ Будите Ми свидетелие, и Аз свидетель, глаголет Господь Бог, и отрок Мой, егоже избрах, да увесте и веруете Ми и уразумеете, яко Аз есмь: прежде Мене не бысть ин Бог, и по Мне не будет.

¹¹ Аз Бог, и несть разве Мене Спасаяй.

¹² Аз возвестих и спасох, укорих, и не бе в вас чуждий: вы Мне свидетелие, и Аз свидетель, глаголет Господь Бог,

¹³ еще от начала, и несть изимаяй от руку Моею: сотворю, и кто отвратит е?

¹⁴ Тако глаголет Господь Бог, Избавляяй вас, Святый Израилев: вас ради послю в Вавилон и воздвигну вся бежащыя, и Халдее в кораблех свяжутся.

¹⁵ Аз Господь Бог Святый ваш, показавый Израиля Царя вашего.

¹⁶ Сице глаголет Господь, даяй путь по морю и по воде сильне стезю:

¹⁷ изводяй колесницы и кони и народ силен: но успоша и не востанут, угасоша аки лен угашен.

¹⁸ Не поминайте первых, и ветхих не помышляйте,

¹⁹ се, Аз творю новая, яже ныне возсияют, и увесте я: и сотворю в пустыни путь и в безводней реки.

²⁰ Возблагословят Мя зверие селнии, сирини и дщери струфовы: яко дах в пустыни воду и реки в безводней, напоити род Мой избранный,

²¹ люди Моя, яже снабдех, добродетели Моя поведати.

²² Не ныне призвах тебе, Иакове, ниже трудитися сотворих тя, Израилю.

²³ Не принесл еси Мне овец твоих всесожжения твоего, ни в жертвах твоих прославил Мя еси, не поработих тя в жертвах, ниже утруждена сотворих тя в Ливане:

²⁴ не купил еси Мне на сребро фимиама, ниже тука треб твоих возжелах, но во гресех твоих стал еси предо Мною и в неправдах твоих.

²⁵ Аз есмь, Аз есмь заглаждаяй беззакония твоя Мене ради и грехи твоя, и не помяну.

²⁶ Ты же помяни, и да судимся: глаголи ты беззакония твоя прежде, да оправдишися.

²⁷ Отцы ваши первии согрешиша, и князи ваши беззаконноваша на Мя.

²⁸ И оскверниша князи святая Моя, и дах погубити Иакова и Израиля во укоризну.