Библия на церковно-славянском языке - транслитерация современным русским алфавитом
(1751)

Книга пророка Исайи

◄◄ | ◄ | Глава ⚫ | ► | ►►

¹ Се, Владыка Господь Саваоф отимет от Иерусалима и от Иудеи крепкаго и крепкую, крепость хлеба и крепость воды,

² исполина и крепкаго, и человека ратника и судию, и пророка и смотреливаго, и старца

³ и пятьдесятоначалника, и дивнаго советника и премудраго архитектона и разумнаго послушателя.

⁴ И поставлю юношы князи их, и ругателие господствовати будут ими.

⁵ И нападати имут людие, и человек на человека, и человек на ближняго своего: приразится отроча к старцу, и безчестный к честному.

⁶ Яко имется человек брата своего, или домашняго отца своего, глаголя: ризу имаши, началовождь нам буди, и брашно мое под тобою да будет.

⁷ И отвещав в день оный речет: не буду твой началовождь, несть бо в дому моем ни хлеба, ни ризы: не буду началовождь людем сим.

⁸ Яко оставлен бысть Иерусалим, и Иудеа паде, и язык их со беззаконием, не покаряющься Господеви.

⁹ Сего ради ныне смирися слава их, и студ лица их противу ста им: грех же свой яко Содомский возвестиша и явиша. Горе души их, зане умыслиша совет лукавый на себе самих,

¹⁰ рекше: свяжем праведнаго, яко непотребен нам есть. Убо плоды дел своих снедят.

¹¹ Горе беззаконному: лукавая бо приключатся ему по делом руку его.

¹² Людие Мои, приставницы ваши пожинают вас, и истязающии обладают вами: людие Мои, блажащии вас льстят вы и стези ног ваших возмущают.

¹³ Но ныне устроится Господь на суд и поставит на суд люди Своя:

¹⁴ Сам Господь на суд приидет со старейшины людий и со князи их. Вы же почто запалисте виноград Мой, и разграбление убогаго в домех ваших?

¹⁵ Почто вы обидите людий Моих и лице убогих посрамляете? Глаголет Господь Саваоф.

¹⁶ Сия глаголет Господь: понеже вознесошася дщери Сиони и ходиша высокою выею и помизанием очес и ступанием ног, купно ризы влекущыя (по долу) и ногама купно играющыя:

¹⁷ и смирит Господь началныя дщери Сиони, и Господь открыет срамоту их.

¹⁸ В день он, и отимет Господь славу риз их и красоты их, и вплетения златая (на главе) и тресны ризныя, и луницы гривенныя

¹⁹ и срачицы тонкия, и красоту лица их и состроение красы славныя, и обручи и перстни, и мониста и запястия и художныя усерязи,

²⁰ и багряницы и пребагряная, и утварь храмную

²¹ и светлая лаконская, и виссоны и синеты, и червленицы

²² и виссон со златом и синетою претыканы, и тончицы преиманы златом:

²³ и будет вместо вони добрыя смрад, и вместо пояса ужем препояшешися, и вместо украшения златаго, еже на главе, плешь имети будеши дел твоих ради, и вместо ризы багряныя препояшешися вретищем:

²⁴ и сын твой добрейший, егоже любиши, мечем падет, и крепцыи ваши мечем падут и смирятся:

²⁵ и восплачутся хранилища утварей ваших, и останешися едина и о землю ударена будеши.