Библия на церковно-славянском языке - транслитерация современным русским алфавитом
(1751)

Книга пророка Осии

◄◄ | ◄ | Глава ⚫ | ► | ►►

¹ Слышите слово Господне, сынове Израилевы, яко суд Господеви к живущым на земли: зане несть истины, ни милости, ни ведения Божия на земли:

² клятва и лжа, и убийство и татьба и любодеяние разлияся по земли, и кровь с кровьми мешают.

³ Сего ради восплачется земля и умалится со всеми вселившимися на ней, со зверьми польскими и с гады земными и со птицами небесными, и рыбы морския оскудеют:

⁴ яко да никтоже не прится, ни обличается никтоже: людие же мои аки пререкаемый жрец,

⁵ и изнеможет во днех, и изнеможет пророк с тобою: нощи уподобих матерь твою.

⁶ Уподобишася людие Мои аки не имуще умения: яко ты умение отвергл еси, отвергу и Аз тебе, еже не жречествовати Мне, и забыл еси закон Бога своего, забуду и Аз чада твоя.

⁷ По множеству их тако согрешиша Мне: славу их в безчестие положу.

⁸ Грехи людий Моих снедят и в неправдах их возмут душы их.

⁹ И будет якоже людие, тако и жрец: и отмщу на них пути их, и умышления их воздам им.

¹⁰ И будут ясти и не насытятся: соблудиша и не исправятся: понеже Господа оставиша еже снабдети.

¹¹ Блуд и вино и пиянство прият сердце людий Моих.

¹² В знамениих вопрошаху и в жезлех своих поведаху тем: духом блужения прельстишася и соблудиша от Бога своего:

¹³ на версех гор кадяху и на холмех жряху под дубом и под елию и под древом ветвенным, яко добр кров: сего ради соблудят дщери вашя, и невесты вашя возлюбодеют.

¹⁴ И не присещу на дщери вашя, егда соблудят, и на невесты вашя, егда возлюбодеют: яко и тии со блудницами смесишася и со блудниками требы жряху, и людие смыслящии со блудницею сплетахуся.

¹⁵ Ты же, Израилю, не не разумевай, и Иудо: не входите в Галгалу и не восходите в Дом Онов, и не кленитеся Господем живым.

¹⁶ Зане якоже юница стрекалом стречема разсвирепе Израиль: ныне упасет я Господь, яко агнца на пространстве.

¹⁷ Причастник кумиром Ефрем положи себе соблазны,

¹⁸ избра Хананеов: блудяще возблудиша, возлюбиша безчестие от хрепетания своего.

¹⁹ Вихр духа возсвищет в крилех своих, и посрамятся от требищ своих.