Библия на церковно-славянском языке - транслитерация современным русским алфавитом
(1751)

Книга пророка Осии

◄◄ | ◄ | Глава ⚫ | ► | ►►

¹ По словеси Ефремову оправдания прия сей во Израили, и положи я Ваалови, и умре.

² И ныне приложиша согрешати и сотвориша себе слияние от злата и сребра своего по образу идолов, дела художников совершена: им сии глаголют: пожрите человеков, оскудеша бо телцы.

³ Сего ради будут яко облак утренний, якоже роса утренняя идущи, якоже плевы с тока (и прах с ветвия) развеваемый вихром, якоже дым из трубы.

⁴ Аз же Господь Бог твой утверждаяй небо и созидаяй землю, Егоже руце создасте все воинство небесное, и не показах ти их, еже ходити вслед их: и Аз изведох тя из земли Египетския, и бога разве Мене да не познаеши, и спасающаго несть разве Мене.

⁵ Аз пасох тя в пустыни на земли ненаселенней,

⁶ на пажитех их, и насытишася до исполнения, и вознесошася сердца их, сего ради забыша Мя.

⁷ И буду им яко панфирь, и яко рысь на пути Ассириев:

⁸ и срящу их аки медведица лишаема, и разрушу соключение сердец их: и поядят я скимни дубравнии, и зверие польстии расторгнут я.

⁹ В погибели твоей, Израилю, кто поможет тебе?

¹⁰ Где царь твой сей? Той да спасет тя во всех градех твоих: и да судит ти, о немже глаголал еси: даждь ми царя и князя.

¹¹ И дах тебе царя во гневе Моем, и утвержахся в ярости Моей.

¹² Согромаждение неправды Ефрем, сокровен грех его:

¹³ болезни аки раждающия приидут ему: сей сын немудрый, зане ныне не устоит в сокрушении чад.

¹⁴ От руки адовы избавлю я и от смерти искуплю я: где пря твоя, смерте? Где остен твой, аде? Утешение скрыся от очию Моею:

¹⁵ зане сей между братиями разлучит: наведет Господь ветр зноен из пустыни нань, и изсушит жилы его и опустошит источники его: сей изсушит землю его и вся сосуды его любимыя.