Библия на церковно-славянском языке - транслитерация современным русским алфавитом
(1751)

Книга пророка Осии

◄◄ | ◄ | Глава ⚫ | ► | ►►

¹ Ефрем же зол дух, гоняше зной весь день: тщетная и суетная умножи, и завет со Ассирианы завеща, и елей во Египет посылаше.

² И суд Господеви ко Иуде, еже отмстити Иакова: по путем его и по начинанием его воздаст ему.

³ Во утробе запя брата своего и труды своими укрепе к Богу:

⁴ и укрепе со Ангелом и превозможе. Плакашася и молишася ми: в дому Онове обретоша мя, и ту глаголася к ним.

⁵ Господь же Бог Вседержитель будет память Его.

⁶ И ты о Бозе своем обратишися, милость и суд снабди, и приближайся к Богу своему присно.

⁷ Ханаан, в руце его мерило неправды, насильствовати возлюби.

⁸ И рече Ефрем: обаче обогатех, обретох прохлаждение себе: вси труды его не обрящутся ему ради неправд, имиже согреши.

⁹ Аз же Господь Бог твой, изведох тя из земли Египетски: еще вселю тя в кущах, якоже во дни праздника.

¹⁰ И глаголах ко пророком, и аз видения умножих, и в руках пророческих уподобихся.

¹¹ Аще не Галаад есть, убо ложни быша во Галгалех князи требы кладуще, и требища их якоже желви на целизне польстей.

¹² И отиде Иаков на поле Сирийско, и работа Израиль о жене и о жене снабде.

¹³ И пророком изведе Господь Израиля из земли Египетския, и пророком снабдеся.

¹⁴ Разгнева Мя Ефрем и возяри Мя: и кровь его на нем пролиется, и укоризну его воздаст ему Господь.