Библия на церковно-славянском языке - транслитерация современным русским алфавитом
(1751)

Послание апостола Павла Евреям

◄◄ | ◄ | Глава ⚫ | ► | ►►

¹ Имеяше убо первая скиния оправдания службы, святое же людское:

² скиния бо сооружена бысть первая, в нейже светилник и трапеза и предложение хлебов, яже глаголется святая.

³ По вторей же завесе скиния глаголемая Святая святых,

⁴ злату имущи кадилницу и ковчег завета окован всюду златом, в немже стамна злата имущая манну, и жезл Ааронов прозябший, и скрижали завета:

⁵ превышше же его херувими славы, осеняющии олтарь: о нихже не леть ныне глаголати подробну.

⁶ Сим же тако устроеным, в первую убо скинию выну вхождаху священницы, службы совершающе:

⁷ во вторую же единою в лето един архиерей, не без крове, юже приносит за себе и о людских невежествиих.

⁸ Сие являющу Духу Святому, яко не у явися святых путь, еще первей скинии имущей стояние.

⁹ Яже притча во время настоящее утвердися, в неже дарове и жертвы приносятся, не могущыя по совести совершити служащаго,

¹⁰ точию в брашнах и питиях, и различных омовениих, и оправданиих плоти, даже до времене исправления належащая.

¹¹ Христос же пришед Архиерей грядущих благ, болшею и совершеннейшею скиниею, нерукотворенною, сиречь, не сея твари,

¹² ни кровию козлею ниже телчею, но Своею Кровию, вниде единою во святая, вечное искупление обретый.

¹³ Аще бо кровь козляя и телчая и пепел юнчий кропящий оскверненыя освящает к плотстей чистоте:

¹⁴ кольми паче Кровь Христова, Иже Духом Святым Себе принесе непорочна Богу, очистит совесть нашу от мертвых дел, во еже служити нам Богу живу и истинну?

¹⁵ И сего ради новому завету ходатай есть, да смерти бывшей, во искупление преступлений бывших в первем завете, обетование вечнаго наследия приимут званнии.

¹⁶ Идеже бо завет, смерти нужно есть вноситися завещающаго,

¹⁷ завет бо в мертвых известен есть: понеже ничесоже может, егда жив есть завещаваяй.

¹⁸ Темже ни первый без крове обновлен бысть.

¹⁹ Реченней бо бывшей всяцей заповеди по закону от Моисеа всем людем, приемь кровь козлюю и телчую, с водою и волною червленою и иссопом, самыя же тыя книги и вся люди покропи,

²⁰ глаголя: сия кровь завета, егоже завеща к вам Бог.

²¹ И скинию же и вся сосуды служебныя кровию такожде покропи.

²² И отнюд кровию вся очищаются по закону, и без кровопролития не бывает оставление.

²³ Нужда убо бяше образом небесных сими очищатися: самем же небесным лучшими жертвами, паче сих.

²⁴ Не в рукотворенная бо святая вниде Христос, противообразная истинных, но в самое небо, ныне да явится лицу Божию о нас,

²⁵ ниже да многажды приносит Себе, якоже первосвященник входит во святая (святых) по вся лета с кровию чуждею:

²⁶ понеже подобаше бы Ему множицею страдати от сложения мира: ныне же единою в кончину веков, во отметание греха, жертвою Своею явися.

²⁷ И якоже лежит человеком единою умрети, потом же суд,

²⁸ тако и Христос единою принесеся, во еже вознести многих грехи, второе без греха явится, ждущым Его во спасение.