Библия на церковно-славянском языке - транслитерация современным русским алфавитом
(1751)

Первая книга Моисеева Бытие

◄◄ | ◄ | Глава ⚫ | ► | ►►

¹ Бысть же в то время, отиде Иуда от братии своея и прииде к человеку некоему Одолламитину, емуже имя Ирас:

² и виде тамо Иуда дщерь человека Хананейска, ейже имя Сава: и поят ю, и вниде к ней:

³ и заченши роди сына, и нарече имя ему Ир:

⁴ и заченши еще роди сына и нарече имя ему Авнан:

⁵ и приложивши роди сына (третияго) и нарече имя Силом: сия же бе в Хасве, егда роди сих.

⁶ И поя Иуда жену Иру первенцу своему, ейже имя Фамарь.

⁷ Бысть же Ир первенец Иудин зол пред Господем: и уби его Бог.

⁸ Рече же Иуда Авнану: вниди к жене брата твоего и совокупися с нею, и возстави семя брату твоему.

⁹ Познав же Авнан, яко не ему будет семя, бысть егда вхождаше к жене брата своего, проливаше (семя) на землю, еже не дати семене брату своему:

¹⁰ зло же явися пред Богом, яко сотвори сие: и умертви и сего.

¹¹ Рече же Иуда Фамари, невестце своей (по смерти дву сынов своих): седи вдовою в дому отца твоего, дондеже велик будет Силом, сын мой. Рече бо (во уме си): да не когда умрет и сей, якоже и братия его. Отшедши же Фамарь, седяше в дому отца своего.

¹² Умножишася же дние, и умре Сава жена Иудина. И утешився Иуда, взыде к стригущым овцы его сам, и Ирас пастырь его Одолламитин, во Фамну.

¹³ И возвестиша Фамари невестце его, глаголюще: се, свекор твой восходит во Фамну стрищи овцы своя.

¹⁴ Она же свергши ризы вдовства с себе, облечеся в ризу летнюю и украсися, и седе пред враты Енани, яже суть на пути Фамны: ведяше бо, яко велик бысть Силом: сей же не даде ея ему в жену.

¹⁵ И видев ю Иуда, возмне ю блудницу быти: покры бо лице свое, и не позна ея.

¹⁶ Уклонися же к ней путем и рече ей: попусти ми внити к себе. Не позна бо, яко невестка ему есть. Она же рече: что ми даси, аще внидеши ко мне?

¹⁷ Он же рече: аз тебе послю козлище коз от овец моих. Она же рече: аще даси ми залог, дондеже пришлеши.

¹⁸ Он же рече: кий залог тебе дам? Она же рече: перстень твой и гривну, и жезл иже в руце твоей. И даде ей, и вниде к ней, и зача во утробе от него.

¹⁹ И воставши отиде, и сверже ризу летнюю с себе и облечеся в ризы вдовства своего.

²⁰ Посла же Иуда козлище от коз рукою пастыря своего Одолламитина взяти залог от жены, и не обрете ея.

²¹ Вопроси же мужей места того и рече им: где есть блудница бывшая во Енане на распутии? И реша: не бе зде блудница.

²² И возвратися ко Иуде и рече: не обретох: и человецы места того глаголют: несть зде блудницы.

²³ Рече же Иуда: да имать та: но да не когда посмеются нам: аз убо послах козлище сие, ты же не обрел еси.

²⁴ Бысть же по трех месяцех, поведаша Иуде, глаголюще: соблуди Фамарь невестка твоя, и се, во утробе имать от блуда. Рече же Иуда: изведите ю, и да сожгут ю.

²⁵ Она же ведома посла к свекру своему, глаголющи: от человека, егоже сия суть, аз во утробе имам. И рече: познай, чий перстень и гривна и жезл сей.

²⁶ Позна же Иуда и рече: оправдася Фамарь паче мене, яко не дах ея Силому сыну моему. И не приложи ктому познати ю.

²⁷ Бысть же егда раждаше, и беста близнята во утробе ея.

²⁸ Бысть же в рождении ея, един произнесе руку: вземши же баба навяза на руку его червлень, глаголющи: сей изыдет первый.

²⁹ Егда же вовлече руку, и абие изыде брат его. Она же рече: что пресечеся тебе ради преграждение? И прозва имя ему Фарес.

³⁰ И посем изыде брат его, емуже бе на руце его червлень: и прозва имя ему Зара.