Библия на церковно-славянском языке - транслитерация современным русским алфавитом
(1751)

Первая книга Моисеева Бытие

◄◄ | ◄ | Глава ⚫ | ► | ►►

¹ Изыде же Дина дщи Лиина, юже роди Иакову, познати дщери обитателей.

² И виде ю Сихем сын Емморов Хорреанин, князь тоя земли: и поим ю, бысть с нею и смири ю:

³ и внят душею Дине дщери Иаковли, и возлюби девицу, и глагола к ней по мысли девицы.

⁴ Рече же Сихем ко Еммору отцу своему, глаголя: поими мне отроковицу сию в жену.

⁵ Иаков же слыша, яко оскверни сын Емморов Дину дщерь его: сынове же его бяху со скоты его на поли: премолча же Иаков, дондеже приити им.

⁶ Изыде же Еммор отец Сихемль ко Иакову глаголати к нему.

⁷ Сынове же Иаковли приидоша с поля: егда же услышаша, смутишася мужие, и жалостно им бысть зело, яко не лепо сотвори во Израили, быв со дщерию Иаковлею: и не будет сице.

⁸ И рече им Еммор, глаголя: Сихем сын мой избра душею дщерь вашу: дадите убо ю в жену ему:

⁹ и сосватайтеся с нами: дщери вашя дадите нам, и дщери нашя поимите сыновом своим,

¹⁰ и у нас населитеся: и се, земля пространна пред вами: населитеся и куплю дейте на ней, и притяжите на ней.

¹¹ Рече же Сихем ко отцу ея и ко братиям ея: да обрящу благодать пред вами, и еже аще речете, дадим:

¹² умножите вено зело, и дам, якоже речете ми: и дасте ми отроковицу сию в жену.

¹³ Отвещаша же сынове Иаковли Сихему и Еммору отцу его с лестию, и глаголаша к ним, яко оскверниша Дину сестру их.

¹⁴ И рекоста им Симеон и Левий, братия Динины (сынове Лии): не возможем сотворити глагола сего, дати сестру нашу человеку, иже имать крайнюю плоть необрезанну: есть бо укоризна нам:

¹⁵ токмо в сем уподобимся вам и вселимся у вас, аще будете якоже мы и вы, егда обрежете весь мужеск пол:

¹⁶ и дадим дщери нашя вам, и от дщерей ваших поймем себе жены и вселимся у вас, и будем яко един род:

¹⁷ аще же не послушаете нас, еже обрезатися, поимше дщерь нашу отидем.

¹⁸ И угодна быша словеса пред Еммором и пред Сихемом сыном Емморовым:

¹⁹ и не премедли юноша сотворити глагол сей: любяше бо дщерь Иаковлю. Сей же бяше славнейший всех, иже в дому отца его.

²⁰ Прииде же Еммор и Сихем сын его пред врата града своего и глаголаста к мужем града своего, рекуще:

²¹ человецы сии мирни суть, с нами да населятся на земли и да куплю деют на ней: земля же се пространна пред ними: дщери их да поймем себе в жены, и дщери нашя дадим им:

²² в сем точию уподобятся нам человецы, еже жити с нами, яко быти людем единем: внегда обрезати нам весь мужеск пол, якоже и тии обрезани суть:

²³ и скоти их и четвероногая, и имения их не наша ли будут? Точию в сем уподобимся им, и вселятся с нами.

²⁴ И послушаша Еммора и Сихема сына его вси исходящии из врат града своего и обрезаша плоть крайнюю свою, всяк мужеск пол.

²⁵ Бысть же в третий день, егда бяху в болезни, взяша два сына Иаковля Симеон и Левий, братия Динины, кийждо свой мечь, и внидоша во град безопасно и изсекоша весь мужеск пол:

²⁶ Еммора же и Сихема сына его усекнуша острием меча, и взяша Дину от дому Сихема и изыдоша.

²⁷ Сынове же Иаковли внидоша к побиенным и разграбиша град, в немже оскверниша Дину сестру их:

²⁸ и овцы их и говяда их и ослы их, и елика бяху во граде, и елика бяху на поли, взяша:

²⁹ и вся чада их и вся сосуды их и жены их плениша: и разграбиша, елика бяху во граде, и елика бяху в домех.

³⁰ Рече же Иаков к Симеону и Левии: ненавистна мя сотвористе, яко злу мне быти всем живущым на земли, в Хананеах и Ферезеах, аз же мал есмь числом: и собравшеся на мя изсекут мя, и истреблен буду аз и дом мой.

³¹ Они же рекоша: аки блудницу ли возимеют сестру нашу?