Бiблiя беларуская - пераклад Василя Сёмухи
(1995, Минск)

Да Галятаў

◄◄ | ◄ | Глава ⚫ | ► | ►►

¹ Дык стойце ж у свабодзе, якую даў нам Хрыстос, і ня схіляйцеся зноў пад ярмо рабства.

² Вось, я, Павал, кажу вам: калі вы абразаецеся, ня будзе вам ніякае карысьці ад Хрыста.

³ Яшчэ сьведчу кожнаму чалавеку, які абразаецца, што ён павінен выконваць увесь закон.

⁴ Вы, хто апраўдвае сябе законам, засталіся бяз Хрыста, адпаліся ад мілаты,

⁵ а мы духам чакаем і спадзяёмся на праведнасьць ад веры;

⁶ бо ў Хрысьце Ісусе ня мае сілы ні абразаньне, ні неабразаньне, а вера, якая дзее празь любоў.

⁷ Вы ішлі хораша: хто спыніў вас, каб вы не скараліся ісьціне?

⁸ Такое перакананьне не ад Таго, Хто заклікае вас.

⁹ Каліва закваскі расчыняе ўсё цеста.

¹⁰ Я пэўны за вас у Госпадзе, што вы ня будзеце думаць іначай; а той, хто змушчае вас, хто б ён ні быў, панясе на сабе асуду.

¹¹ За што ж гоняць мяне, браты, калі я і цяпер прапаведую абразаньне? Тады ганьба крыжа спынілася б.

¹² О, калі б выдаліць тых, якія баламуцяць вас!

¹³ Да вольнасьці закліканы вы, браты, толькі вольнасьць ваша ня была б повадам дагаджаць плоці; а любоўю служэце адно аднаму.

¹⁴ Бо ўвесь закон у адзін сказ укладваецца: "любі блізкага твайго, як самога сябе".

¹⁵ Калі ж паміж сабою грызяцеся і ясьце адно аднаго, дык глядзеце, каб не панішчылі вы адно аднаго.

¹⁶ Я кажу: рабеце паводле Духа, і вы ня будзеце паддавацца пажадзе плоці;

¹⁷ бо плоць жадае супраціўнага Духу, а Дух - супраціўнага плоці: яны адно аднаму супрацівяцца, так што вы ня тое робіце, чаго хацелі б.

¹⁸ Калі ж вас Дух водзіць, дык вы не пад законам.

¹⁹ Дзеі плоці вядомыя; вось яны: пералюбства, блуд, нечыстата, непатрэбства,

²⁰ ідаласлужэньне, чарадзейства, варожасьць, свары, зайздрасьць, гнеў, звады, раздоры (спакусы), ерасі,

²¹ нянавісьць, забойствы, п'янства, закалоты і іншае такое; папярэджваю вас, як і раней папярэджваў, што тыя, хто робіць так, Царства Божага не ўспадкуюць.

²² А плод Духа: любоў, радасьць, згода, доўгая цярплівасьць, добрасьць, міласэрнасьць, вера,

²³ лагоднасьць, устрымлівасьць. На такіх няма закона.

²⁴ А тыя, якія Хрыстовыя, укрыжавалі цела з пажадлівасьцю і пахацінствамі.

²⁵ Калі мы жывём Духам, дык згодна з Духам і рабіць павінны.

²⁶ Ня будзем пустаславіцца, адно аднаго дражніць, адно аднаму зайздросьціць.

²⁷ Галятаў 6

²⁸ Браты! калі і дапусьціць чалавек якую пагрэшнасьць, вы, духоўныя, папраўляйце такога ў духу лагоды, зважаючы кожны на сябе, каб ня дацца спакусе.

²⁹ Насеце цяжары адно аднаго, і такім чынам выканаеце закон Хрыстовы.

³⁰ Бо хто лічыць, што ён нешта такое, калі ён нішто, той ашуквае самога сябе.

³¹ Кожны няхай правярае сваю дзею, і тады мецьме пахвалу толькі ў сабе, а ня ў іншым,

³² бо кожны панясе свой цяжар.

³³ Той, каго настаўляюць словам, дзяліся ўсякім дабром з тым, хто настаўляе.

³⁴ Ня крывеце душою: Бог паганьбёны ня бывае. Што пасее чалавек, тое і сажне:

³⁵ хто сее ў плоць сваю, ад плоці пажне прахласьць; а хто сее ў Дух, ад Духа пажне жыцьцё вечнае.

³⁶ Робячы дабро, ня струджваймася: бо ў свой час пажнём, калі не аслабнем.

³⁷ Дык вось, пакуль ёсьць час, будзем рабіць дабро ўсім, а найбольш сваім аднаверцам.

³⁸ Бачыце, як многа напісаў я вам сваёю рукою.

³⁹ Тыя, што хочуць хваліцца паводле цела, змушаюць вас абразацца толькі дзеля таго, каб унікнуць ганеньняў за крыж Хрыстовы,

⁴⁰ бо і самі абрэзаныя ня трымаюцца закона, але хочуць, каб вы абразаліся, каб пахваліцца ў вашай плоці;

⁴¹ а я не хачу хваліцца, хіба толькі крыжам Госпада нашага Ісуса Хрыста, Якім для мяне сьвет укрыжаваны, а я для сьвету.

⁴² Бо ў Хрысьце Ісусе ня мае сілы ні абразаньне, ні неабразаньне, а новае стварэньне.

⁴³ Тым, якія чыняць у згодзе з гэтым правілам, мір ім і міласьць, і Ізраілю Божаму.

⁴⁴ У астатнім, хай ніхто не стурбуе мяне, бо я нашу раны Ісусавыя на целе маім.

⁴⁵ Мілата Госпада нашага Ісуса Хрыста з духам вашым, браты. Амін.