Библия на церковно-славянском языке - транслитерация современным русским алфавитом
(1751)

Послание апостола Павла Галатам

◄◄ | ◄ | Глава ⚫ | ► | ►►

¹ Глаголю же: в елико время наследник млад есть, ничимже лучший есть раба, господь сый всех:

² но под повелители и приставники есть даже до нарока отча.

³ Такожде и мы, егда бехом млади, под стихиами бехом мира порабощени:

⁴ егда же прииде кончина лета, посла Бог Сына Своего Единороднаго, Раждаемаго от жены, бываема под законом,

⁵ да подзаконныя искупит, да всыновление восприимем.

⁶ И понеже есте сынове, посла Бог Духа Сына Своего в сердца ваша, вопиюща: Авва Отче.

⁷ Темже уже неси раб, но сын: аще ли же сын, и наследник Божий Иисус Христом.

⁸ Но тогда убо, не ведуще Бога, служисте не по естеству сущым богом:

⁹ ныне же, познавше Бога, паче же познани бывше от Бога, како возвращаетеся паки на немощныя и худыя стихии, имже паки свыше служити хощете?

¹⁰ Дни смотряете, и месяцы, и времена, и лета.

¹¹ Боюся о вас, еда како всуе трудихся в вас.

¹² Будите якоже аз, зане и аз, якоже вы: братие, молю вы. Ничимже мене обидесте:

¹³ весте же, яко за немощь плоти благовестих вам первее.

¹⁴ И искушения моего, еже во плоти моей, не уничижисте, ни оплевасте, но якоже Ангела Божия приясте мя, яко Христа Иисуса.

¹⁵ Кое убо бяше блаженство ваше, свидетельствую бо вам, яко, аще бы было мощно, очеса ваша извертевше дали бысте ми.

¹⁶ Темже враг вам бых, истину вам глаголя?

¹⁷ Ревнуют по вас не добре, но отлучити вас хотят, да им ревнуете.

¹⁸ Добро же, еже ревновати всегда в добрем, и не точию внегда приходити ми к вам.

¹⁹ Чадца моя, имиже паки болезную, дондеже вообразится Христос в вас:

²⁰ хотел же бых приити к вам ныне и изменити глас мой, яко не домышляюся о вас.

²¹ Глаголите ми, иже под законом хощете быти: закона ли не слушаете?

²² Писано бо есть, яко Авраам два сына име: единаго от рабы, а другаго от свободныя.

²³ Но иже от рабы, по плоти родися: а иже от свободныя, по обетованию.

²⁴ Иже суть иносказаема: сия бо еста два завета: един убо от горы Синайския, в работу раждаяй, иже есть Агарь:

²⁵ Агарь бо, Сина гора есть во Аравии, прилагается же нынешнему Иерусалиму, работает же с чады своими:

²⁶ а вышний Иерусалим свободь есть, иже есть мати всем нам.

²⁷ Писано бо есть: возвеселися, неплоды, не раждающая: расторгни и возопи, неболящая: яко многа чада пустыя паче, нежели имущия мужа.

²⁸ Мы же, братие, по Исааку обетования чада есмы.

²⁹ Но якоже тогда по плоти родивыйся гоняше духовнаго, тако и ныне.

³⁰ Но что глаголет Писание? Изжени рабу и сына ея, не имать бо наследовати сын рабынин с сыном свободныя.

³¹ Темже, братие, несмы рабынина чада, но свободныя.