Библия на церковно-славянском языке - транслитерация современным русским алфавитом
(1751)

Послание апостола Павла Галатам

◄◄ | ◄ | Глава ⚫ | ► | ►►

¹ Потом же по четыренадесяти летех паки взыдох во Иерусалим с Варнавою, поем с собою и Тита.

² Взыдох же по откровению, и предложих им благовествование, еже проповедую во языцех, наедине же мнимым, да не како вотще теку, или текох.

³ Но ни Тит, иже со мною, Еллин сый, нужден бысть обрезатися.

⁴ И за пришедшую лжебратию, иже привнидоша соглядати свободы нашея, юже имамы о Христе Иисусе, да нас поработят:

⁵ имже ни к часу повинухомся в покорение, да истина благовестия пребудет в вас.

⁶ От мнящихся же быти что, якови некогда беша, ничтоже ми разнствует: лица Бог человеча не приемлет. Мне бо мнимии ничтоже привозложиша:

⁷ но сопротивное, уразумевше, яко уверено ми бысть благовестие необрезания, якоже Петру обрезания:

⁸ ибо Споспешествовавый Петру в послание обрезания, споспешествова и мне во языки:

⁹ и познавше благодать данную ми, Иаков и Кифа и Иоанн, мнимии столпи быти, десницы даша мне и Варнаве общения, да мы во языки, они же во обрезание,

¹⁰ точию нищих да помнима: еже и потщахся сие истое сотворити.

¹¹ Егда же прииде Петр во Антиохию, в лице ему противустах, яко зазорен бе.

¹² Прежде бо даже не приити неким от Иакова, с языки ядяше: егда же приидоша, опряташеся и отлучашеся, бояся сущих от обрезания.

¹³ И лицемеришася с ним и прочии Иудеи, яко и Варнаве пристати лицемерству их.

¹⁴ Но егда видех, яко не право ходят ко истине Благовествования, рекох Петру пред всеми: аще ты, Иудей сый, язычески, а не иудейски живеши, почто языки нудиши иудейски жительствовати?

¹⁵ Мы естеством Иудее, а не от язык грешницы:

¹⁶ уведевше же, яко не оправдится человек от дел закона, но токмо верою Иисус Христовою, и мы во Христа Иисуса веровахом, да оправдимся от веры Христовы, а не от дел закона: зане не оправдится от дел закона всяка плоть.

¹⁷ Аще ли, ищуще оправдитися о Христе, обретохомся и сами грешницы, Христос убо греху ли служитель? Да не будет.

¹⁸ Аще бо, яже разорих, сия паки созидаю, преступника себе представляю.

¹⁹ Аз бо законом закону умрох, да Богови жив буду. Христови сраспяхся:

²⁰ живу же не ктому аз, но живет во мне Христос. А еже ныне живу во плоти, верою живу Сына Божия, возлюбившаго мене и предавшаго Себе по мне.

²¹ Не отметаю благодати Божия. Аще бо законом правда, убо Христос туне умре.