Библия на церковно-славянском языке - транслитерация современным русским алфавитом
(1751)

Книга пророка Иезекииля

◄◄ | ◄ | Глава ⚫ | ► | ►►

¹ И бысть слово Господне ко мне глаголя:

² и ты, сыне человечь, рцы: сия глаголет Господь: земли Израилеве конец прииде, конец прииде на четыри краи земли.

³ Пришел есть конец, ныне конец тебе, и испущу ярость Мою на тя, и отмщу тебе по путем твоим, и дам на тя вся мерзости твоя.

⁴ Не пощадит око Мое на тя, и не помилую, зане путь твой на тя дам, и мерзости твоя среде тебе будут, и увеси, яко Аз Господь.

⁵ Темже сия глаголет Адонаи Господь: зло едино зло, се, идет.

⁶ Конец пришел есть, прииде конец, воста на тя, се, прииде.

⁷ Прииде плетение на тя живущаго на земли: прииде время, приближися день, не с молвою, ниже с болезньми.

⁸ Ныне изблизу излию гнев Мой на тя и скончаю ярость Мою на тебе, и осужду тя по путем твоим и дам на тя вся мерзости твоя.

⁹ Не пощадит око Мое, и не помилую, зане пути твоя на тя дам, и мерзости твоя посреде тебе будут, и познаеши, яко Аз Господь бияй.

¹⁰ Се, день Господень приходит, се, конец пришел есть, изыде плетение, и процвете жезл,

¹¹ прозябе укоризна, и сокрушит утверждение беззаконника: и не с плищем, ни с потщанием: и не от них суть, и несть красы в них.

¹² Прииде время, приближися день: купуяй да не радуется, и продаяй да не плачется, яко гнев на все множество их.

¹³ Занеже притяжаваяй ко продающему ктому не возвратится, и еще в жизни живущему, яко видение на все множество их не возвратится, и человек во очесех жизни своея не укрепится.

¹⁴ Вострубите трубою и разсудите вся, и не будет грядущаго на рать, яко гнев Мой на все множество их.

¹⁵ Рать отвне с мечем, глад же и смерть извнутрь: иже на поли мечем скончается, сущих же во граде глад и смерть скончает.

¹⁶ И уцелеют спасеннии от них и будут на горах яко голубицы скорбяще: и всех избию, коегождо в неправдах его.

¹⁷ Вся руки разслабеют, и вся стегна окаляются мокростию.

¹⁸ И препояшутся во вретища, и покрыет я ужас: и на всяцем лицы срам на них, и на всяцей главе плешь.

¹⁹ Сребро их на стогнах повержется, и злато их презрено будет: сребро их и злато не возможет избавити их в день гнева Господня, души их не насытятся, и чрева их не наполнятся, зане казнь неправостей их бысть.

²⁰ Избранныя утвари в гордыню положиша я, и образы мерзостей своих и гнусности сотвориша от них: сего ради дах оная им в нечистоту.

²¹ И предам я в чуждия руце, еже разграбити я, и губителем земли в корысти, и осквернят я.

²² И отвращу лице Мое от них, и осквернят стражбу Мою, и внидут в ня неопасно, и осквернят я:

²³ и сотворят мятеж, понеже земля полна суда крове, и град полн беззакония.

²⁴ И приведу злыя языки, и наследят домы их: и отвращу величание крепости их, и осквернятся святая их.

²⁵ И моление приидет, и взыщет мира, и не будет.

²⁶ Горе на горе будет, и весть на весть будет, и не будет видение от пророка, и закон погибнет от жерца и совет от старец.

²⁷ Царь восплачется, и князь облечется в пагубу, и руки людий земли разслабеют: по путем их сотворю им и по судом их отмщу им, и уразумеют, яко Аз Господь.