Библия на церковно-славянском языке - транслитерация современным русским алфавитом
(1751)

Книга пророка Иезекииля

◄◄ | ◄ | Глава ⚫ | ► | ►►

¹ И ты, сыне человечь, прорцы на Гога и рцы: сия глаголет Адонаи Господь: се, Аз на тя, Гог, князя Рос, Мосоха и Фовеля,

² и соберу тя и наставлю тя, и возведу тя от конца севера и возведу тя на горы Израилевы:

³ и исторгну лук твой от руки твоея левыя и стрелы твоя от руки твоея десныя,

⁴ и поражу тя на горах Израилевых, и падеши ты и вси иже окрест тебе, и языцы иже с тобою отдадятся во множество птиц всякому парящему, и всем зверем польным дах тя на изядение:

⁵ на лицы поля падеши, яко Аз глаголах, глаголет Адонаи Господь.

⁶ И пущу огнь на Магога, и населятся острови с миром,

⁷ и уведят, яко Аз есмь Господь, и имя Мое святое вестно будет среде людий Моих Израиля, и не осквернится имя Мое святое ктому, и уведят вси языцы, яко Аз есмь Господь Святый среде Израиля.

⁸ Се, приспе, и увеси, яко будет, глаголет Адонаи Господь: се есть день, о немже глаголах,

⁹ и изыдут живущии во градех Израилевых, и пожгут оружие, и щиты и копия, и луки и стрелы, и жезлы ручныя и сулицы, и раждегут ими огнь седмь лет:

¹⁰ и не возмут древес с поля, ни изсекут от дубравы, но оружием раждегут огнь, и пленят пленившыя их и расхитят расхитивших я, глаголет Адонаи Господь.

¹¹ И будет, в той день дам Гогу место нарочито, гроб во Израили, многопогребателно, пришедших на восток моря, и заградят устие дебри и погребут тамо Гога и все множество его, и прозовется та дебрь: многопогребателное Гога.

¹² И закопают я дом Израилев, да очистится земля в седмь месяц,

¹³ и погребут я вси людие земли, и будет им именито, в оньже день прославлюся, глаголет Адонаи Господь.

¹⁴ И мужей всегда поставят обходити всю землю, еже погребсти оставшихся на лицы земли и очистити ю по седми месяцех, и взыщут опасно.

¹⁵ Всяк проходяй землю и узревый кость человечу сотворит у нея знамение, дондеже погребут ю погребающии в дебри, многопогребателнем Гогове.

¹⁶ Ибо имя месту (прозовется) Падение многопогребателное: и очистится земля.

¹⁷ И ты, сыне человечь, рцы: сия глаголет Адонаи Господь: рцы всяцей птице парящей и ко всякому зверю селному: соберитеся и приидите от всех окрестных его на заколение Мое, еже заклах вам, заклание велие на горах Израилевых, ядите мяса и пийте кровь:

¹⁸ мяса исполинов изясте и кровь князей земных испиете, овны и телцы, и козлы и волы тучнии вси:

¹⁹ и да ясте тук до сытости и испиете кровь до пиянства от заклания Моего, еже заклах вам:

²⁰ и насытитеся от трапезы Моея, от коня и всадника, исполина и всякаго мужа воинскаго, глаголет Адонаи Господь.

²¹ И дам славу Мою в вас, и узрят вси языцы суд Мой, егоже сотворих, и руку Мою, юже наведох на ня,

²² и увесть дом Израилев, яко Аз есмь Господь Бог их от сего дне и в прочыя.

²³ И уведят вси языцы, яко грехов ради своих пленени быша дом Израилев, понеже отвергошася Мене, и отвратих лице Мое от них и предах я в руце врагов их, и падоша мечем вси:

²⁴ по нечистотам их и по беззаконием их сотворих им и отвратих лице Мое от них.

²⁵ Того ради сия глаголет Адонаи Господь: ныне возвращу пленение Иаковле и помилую дом Израилев, и возревную имене ради Моего святаго:

²⁶ и возмут безчестие свое и всякую неправду свою, еюже неправдоваша, егда вселятся на земли своей с миром и не будет устрашающаго,

²⁷ внегда возвращу я от язык и соберу я от стран языческих и освящуся в них пред языки:

²⁸ и уведят, яко Аз есмь Господь Бог их, внегда явлюся им во языцех и соберу я на землю их и не оставлю от них тамо ктому:

²⁹ и не отвращу лица Моего ктому от них, зане излиях ярость Мою на дом Израилев, глаголет Адонаи Господь.