Библия на церковно-славянском языке - транслитерация современным русским алфавитом
(1751)

Книга пророка Иезекииля

◄◄ | ◄ | Глава ⚫ | ► | ►►

¹ И бысть слово Господне ко мне глаголя:

² сыне человечь, прорцы и рцы: сия глаголет Адонаи Господь:

³ возрыдайте: оле, оле день! Яко близ день Господень, и приближается день облака, и конец языков будет:

⁴ и приидет мечь на Египтяны, и будет мятеж во Ефиопии, и падут язвении во Египте, и взято будет множество их, и падутся основания его:

⁵ Персяне и Критяне, и Лидяне и Ливиане, и Мурини (и вся Аравиа) и вси примесницы, и сынове, иже от завета Моего, в нем мечем падут с ним.

⁶ Сия глаголет Господь: и падут подпоры Египта, и снидет укоризна крепости его от Магдола даже до Сиины, мечем падут в нем, глаголет Адонаи Господь.

⁷ И опустеют среде стран погибших, и гради их среде градов опустевших будут:

⁸ и уразумеют, яко Аз есмь Господь, егда дам огнь на Египет, и сокрушатся вси помагающии ему.

⁹ В той день приидут вестницы от лица Моего в сиеим тщащеся погубити надежду Муринския земли, и будет им мятеж в день Египетск, яко се, приспе.

¹⁰ Сия глаголет Адонаи Господь: и погублю множество Египтян рукою Навуходоносора царя Вавилонска,

¹¹ самаго и людий его с ним, губителие от язык послани погубити землю: и извлекут вси мечы своя на Египта, и наполнится земля язвеными.

¹² И дам реки их во опустение и отдам землю в руце злых, и погублю землю и исполнение ея руками чуждих, Аз Господь глаголах.

¹³ Яко сия глаголет Адонаи Господь: погублю кумиры и испражню вельможы от Мемфиса и старейшины от земли Египетския, и не будут ктому: и дам страх во земли Египетстей.

¹⁴ И погублю землю Фафорскую, и дам огнь на Таниса, и сотворю отмщение в Диосполи,

¹⁵ и излию ярость Мою на Саин крепость Египетску, и погублю множество Мемфы.

¹⁶ И дам огнь на Египта, и мятежем возмятется Саис, и в Диосполи будет разселина, и разлиются воды.

¹⁷ Юноши Илиуполя и Вуваста мечем падут, и жены в плен пойдут:

¹⁸ и в Тафнесе помрачится день, егда сокрушу тамо скипетры Египетски, и погибнет тамо укоризна крепости его, и того покрыет облак, и дщери его во пленение отведутся.

¹⁹ И сотворю суд во Египте, и уразумеют, яко Аз есмь Господь.

²⁰ И бысть во единонадесятое лето, в первый месяц, в седмый день месяца, бысть слово Господне ко мне глаголя:

²¹ сыне человечь, мышцы фараона царя Египетска сотрох, и се, не помолися, еже дати ему цельбу, приложити ему пластырь, (обязати,) дати силу, да возмет мечь.

²² Того ради сия глаголет Адонаи Господь: се, Аз на фараона царя Египетска, и сокрушу мышцы его крепкия и протяженыя и сотреныя, и изрину мечь его из руки его:

²³ и разсею Египта во языки и развею их во страны:

²⁴ и укреплю мышцы царя Вавилонска и дам мечь Мой в руку его, и наведет его на Египта, и пленит пленение его, и возмет корысти его:

²⁵ и укреплю мышцы царя Вавилонска, мышцы же фараони падут: и уведят, яко Аз есмь Господь, егда дам мечь Мой в руце царя Вавилонска, и прострет его на землю Египетску,

²⁶ и разсею Египта во языки и развею их во страны: и уведят вси, яко Аз есмь Господь.