Библия на церковно-славянском языке - транслитерация современным русским алфавитом
(1751)

Вторая книга Моисеева Исход

◄◄ | ◄ | Глава ⚫ | ► | ►►

¹ И по сих вниде Моисей и Аарон к фараону и реша ему: сия глаголет Господь Бог Израилев: отпусти люди Моя, да праздник сотворят Мне в пустыни.

² Рече же фараон: кто есть, Егоже послушаю гласа, яко отпустити имам сыны Израилевы? Не вем Господа, и Израиля не отпущу.

³ И глаголют ему: Бог Еврейский призва нас: пойдем убо путем трех дний в пустыню, да пожрем Господу Богу нашему, да не когда случится нам смерть или убийство.

⁴ И рече им царь Египетский: вскую, Моисей и Аарон, развращаете люди моя от дел их? Идите кийждо вас на дела своя.

⁵ И рече фараон: се, ныне умножишася людие сии на земли: убо не дадим почити им от дел.

⁶ Заповеда же фараон приставником дел людских и книгочиям, глаголя:

⁷ не ктому приложите даяти плев людем к плинфоделанию, якоже вчера и третияго дне: но сами да идут и собирают плевы себе:

⁸ и урок плинфоделания, еже они творят, на кийждо день наложите им: не уемлите ничтоже: праздни бо суть: сего ради возопиша, глаголюще: да пойдем, и пожрем Богу нашему:

⁹ да отягчатся дела людий сих, и да пекутся о них, и не помыслят о словесех суетных.

¹⁰ Понуждаху же их приставницы и книгочия и глаголаху людем, рекуще: сия глаголет фараон: не ктому даю вам плев:

¹¹ сами вы шедше собирайте себе плевы, идеже аще обрящете: ибо не будет уято от урока вашего ничтоже.

¹² И разыдошася людие по всей земли Египетстей собирати тростие на плевы.

¹³ Приставницы же понуждаху их, глаголюще: совершайте дела ваша урочная на всяк день, якоже и егда плевы даяхом вам.

¹⁴ И биени быша книгочия рода сынов Израилевых, иже быша приставлени над ними от приставников фараоновых, глаголюще: почто не совершисте урока вашего плинфеннаго, якоже вчера и третияго дне, такожде и днесь?

¹⁵ Вшедше же книгочия сынов Израилевых, возопиша к фараону, глаголюще: почто ты тако твориши рабом твоим?

¹⁶ Плев не дают рабом твоим, и плинфы нам глаголют творити: и се, раби твои мучими суть: обидиши убо людий твоих.

¹⁷ И рече им: праздни, праздни есте: сего ради глаголете: да идем, пожрем Богу нашему:

¹⁸ ныне убо шедше делайте плев бо не дам вам, урок же делания плинфеннаго да отдаете.

¹⁹ Видяху же книгочии сынов Израилевых себе во злых, глаголюще: не оставите плинфоделания урочнаго дню.

²⁰ Сретоша же Моисеа и Аарона, идущих во сретение им, исходящым им от фараона,

²¹ и реша им: да видит Бог и судит вам, яко огнусисте дух ваш пред фараоном и пред рабы его, дати мечь в руки его убити нас.

²² Возвратися же Моисей ко Господу и рече: молютися, Господи, почто озлобил еси люди сия? И вскую послал еси мя?

²³ И отнележе внидох к фараону, глаголати Твоим именем, (он) озлоби люди сия, и не избавил еси людий Твоих.