Бiблiя беларуская - пераклад Василя Сёмухи
(1995, Минск)

Выхад

◄◄ | ◄ | Глава ⚫ | ► | ►►

¹ І наказаў Гасподзь Майсею сказаць:

² скажы сынам Ізраілевым, каб яны зрабілі Мне прынашэньне ад кожнага чалавека, у якога будзе руплівасьць, прымайце прынашэньне Мне.

³ Вось прынашэньні, якія вы павінны прымаць ад іх: золата, і срэбра і медзь,

⁴ і воўну блакітную, пурпуровую і чырванёную, і вісон, і казіную поўсьць,

⁵ і скуры барановыя чырвоныя, і скуры сінія, і дрэвы сітым,

⁶ алей у сьвяцільні, пахошчы ў алей памазаньня і дзеля пахучага каджэньня.

⁷ камень анікс і камяні на аздобу эфода і на нагруднік.

⁸ І ўладзяць яны Мне сьвятыню, і буду жыць сярод іх;

⁹ усё зрабеце, як Я паказваю табе, і ўзор скініі і ўзор усяго посуду яе; так і зрабеце.

¹⁰ Зрабеце каўчэг з дрэва сітым; даўжыня яго два локці з палавінаю, і шырыня яго паўтара локця, і вышыня яго паўтара локця;

¹¹ і абкладзі яго чыстым золатам, зь сярэдзіны і звонку пакрый яго; і зрабі зьверху вакол яго залаты вянок;

¹² і вылі для яго чатыры колцы залатыя і ўмацуй на чатырох ніжніх вуглах яго: два колцы з аднаго боку яго, два з другога боку яго.

¹³ Зрабі з дрэва сітым жэрдкі і абкладзі іх золатам;

¹⁴ і ўкладзі жэрдкі ў колцы, з бакоў каўчэга, каб з дапамогаю іх несьці каўчэг;

¹⁵ у колцах каўчэга павінны быць жэрдкі і не павінны адымацца ад яго.

¹⁶ І пакладзі ў каўчэг адкрыцьцё, якое Я дам табе.

¹⁷ Зрабі таксама вечка з чыстага золата: даўжыня яго два локці з палавінаю, а шырыня яго паўтара локця;

¹⁸ і зрабі з золата двух херувімаў: чаканнага вырабу зрабі іх на абодвух канцах вечка;

¹⁹ зрабі аднаго херувіма з аднаго краю, а другога херувіма з другога краю; пукатымі зь вечка зрабеце херувімаў на абодвух краях яго;

²⁰ і будуць херувімы з паднятымі ўгору крыламі, пакрываючы сваімі крыламі вечка, а тварамі сваімі будуць адзін да аднаго; да вечка будуць твары херувімаў.

²¹ І пакладзі вечка на каўчэг згары, а ў каўчэг пакладзі адкрыцьцё, якое Я дам табе:

²² там Я буду адкрывацца табе і гутарыць з табою над вечкам, сярод двух херувімаў, якія над каўчэгам адкрыцьця, пра ўсё, што толькі буду наказваць празь цябе сынам Ізраілевым.

²³ І зрабі стол з дрэва сітым, даўжынёю ў два локці, шырынёю ў локаць, а вышынёю ў паўтара локця,

²⁴ і абкладзі яго золатам чыстым, і зрабі вакол яго залаты вянок;

²⁵ і зрабі вакол яго сьценкі ў далоню і каля сьценак яго зрабі залаты вянок вакол;

²⁶ і зрабі для яго чатыры колцы залатыя і ўмацуй колцы на чатырох вуглах каля чатырох ножак яго;

²⁷ пры сьценках павінны быць колцы, каб укладваць жэрдкі, каб насіць на іх стол;

²⁸ а жэрдкі зрабі з дрэва сітым і абкладзі іх золатам, і будуць насіць на іх гэты стол;

²⁹ зрабі таксама для яго місы, кадзільніцы, чары і кубкі, каб паліваць зь іх: з золата чыстага зрабі іх;

³⁰ і кладзі на стол хлябы ахвярныя прад абліччам Маім увесь час.

³¹ І зрабі сьвяцільню з золата чыстага; чаканная павінна быць гэтая сьвяцільня; сьцябло яе, галіны яе, чарачкі яе, яблыкі яе і кветкі яе павінны выходзіць зь яе;

³² шэсьць галін павінны выходзіць з бакоў яе: тры галіны сьвяцільні з аднаго боку яе і тры галіны зь сьвяцільні з другога боку яе;

³³ тры чарачкі накшталт міндальнай кветкі, зь яблыкам і кветкамі, павінны быць на адной галіне, і тры чарачкі накшталт міндальнай кветкі, на другой галінцы, зь яблыкамі і кветкамі: так на ўсіх шасьці галінах, якія выходзяць са сьвяцільні;

³⁴ а на сьцяблах сьвяцільні павінны быць чатыры чарачкі накшталт міндальнай кветкі зь яблыкамі і кветкамі;

³⁵ у шасьці галін, што выходзяць са сьцябла сьвяцільні, яблык пад дзьвюма галінамі яе, і яблык пад другімі дзьвюма галінамі, і яблык пад трэцімі дзьвюма галінамі яе;

³⁶ яблыкі і галіны іх зь яе павінны выходзіць: уся павінна быць чаканная, цэльная, з чыстага золата.

³⁷ і зрабі да яе сем лампад, і пастаў на яе лампады яе, каб сьвяцілі на відавы бок яе;

³⁸ і абцугі да яе і латкі да яе з чыстага золата;

³⁹ з таланту золата чыстага хай зробяць яе з усімі гэтымі прычындаламі.

⁴⁰ Глядзі, зрабі іх паводле таго ўзору, які паказаны табе на гары.