Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Exodus

◄◄ | ◄ | Глава ⚫ | ► | ►►

¹ praecepit autem Pharao omni populo suo dicens quicquid masculini sexus natum fuerit in flumen proicite quicquid feminei reservate

² egressus est post haec vir de domo Levi accepta uxore stirpis suae

³ quae concepit et peperit filium et videns eum elegantem abscondit tribus mensibus

⁴ cumque iam celare non posset sumpsit fiscellam scirpeam et linivit eam bitumine ac pice posuitque intus infantulum et exposuit eum in carecto ripae fluminis

⁵ stante procul sorore eius et considerante eventum rei

⁶ ecce autem descendebat filia Pharaonis ut lavaretur in flumine et puellae eius gradiebantur per crepidinem alvei quae cum vidisset fiscellam in papyrione misit unam e famulis suis et adlatam

⁷ aperiens cernensque in ea parvulum vagientem miserta eius ait de infantibus Hebraeorum est

⁸ cui soror pueri vis inquit ut vadam et vocem tibi hebraeam mulierem quae nutrire possit infantulum

⁹ respondit vade perrexit puella et vocavit matrem eius

¹⁰ ad quam locuta filia Pharaonis accipe ait puerum istum et nutri mihi ego tibi dabo mercedem tuam suscepit mulier et nutrivit puerum adultumque tradidit filiae Pharaonis

¹¹ quem illa adoptavit in locum filii vocavitque nomen eius Mosi dicens quia de aqua tuli eum

¹² in diebus illis postquam creverat Moses egressus ad fratres suos vidit adflictionem eorum et virum aegyptium percutientem quendam de Hebraeis fratribus suis

¹³ cumque circumspexisset huc atque illuc et nullum adesse vidisset percussum Aegyptium abscondit sabulo

¹⁴ et egressus die altero conspexit duos Hebraeos rixantes dixitque ei qui faciebat iniuriam quare percutis proximum tuum

¹⁵ qui respondit quis constituit te principem et iudicem super nos num occidere me tu dicis sicut occidisti Aegyptium timuit Moses et ait quomodo palam factum est verbum istud

¹⁶ audivitque Pharao sermonem hunc et quaerebat occidere Mosen qui fugiens de conspectu eius moratus est in terra Madian et sedit iuxta puteum

¹⁷ erant sacerdoti Madian septem filiae quae venerunt ad hauriendas aquas et impletis canalibus adaquare cupiebant greges patris sui

¹⁸ supervenere pastores et eiecerunt eas surrexitque Moses et defensis puellis adaquavit oves earum

¹⁹ quae cum revertissent ad Raguhel patrem suum dixit ad eas cur velocius venistis solito

²⁰ responderunt vir aegyptius liberavit nos de manu pastorum insuper et hausit aquam nobiscum potumque dedit ovibus

²¹ at ille ubi est inquit quare dimisistis hominem vocate eum ut comedat panem

²² iuravit ergo Moses quod habitaret cum eo accepitque Sefforam filiam eius

²³ quae peperit filium quem vocavit Gersam dicens advena fui in terra aliena

²⁴ post multum temporis mortuus est rex Aegypti et ingemescentes filii Israhel propter opera vociferati sunt ascenditque clamor eorum ad Deum ab operibus

²⁵ et audivit gemitum eorum ac recordatus foederis quod pepigerat cum Abraham et Isaac et Iacob

²⁶ respexit filios Israhel et cognovit eos