Библия на церковно-славянском языке - транслитерация современным русским алфавитом
(1751)

Вторая книга Ездры

◄◄ | ◄ | Глава ⚫ | ► | ►►

¹ Во второе же лето царства Дариева пророчества Аггей и Захариа сын Аддов, пророцы, ко Иудеем, иже во Иудеи и во Иерусалиме, именем Господа Бога Израилева к ним.

² Тогда став Зоровавель сын Салафиилев и Иисус сын Иоседеков, начаста созидати дом Господень, иже во Иерусалиме, сущым с ними пророком Господним помагающым им.

³ В то время прииде к ним Сисинний воевода Сирийский и Финикийский и Сафравузан и друзие его, и рекоша им:

⁴ чиим повелением вы дом сей созидаете, и кров сей, и ина вся совершаете? И кто суть строителие, иже сия созидают,

⁵ и имеша благодать посещения бывшаго на пленение от Господа старейшины Иудейстии:

⁶ и не возбраниша им созидати, дондеже возвестится Дарию о сих и отвещано будет.

⁷ Образ же послания, еже писаша Дарию и послаша: Сисинний воевода Сирийский и Финикийский и Сафравузан и друзие, иже в Сирии и Финикии воеводы, царю Дарию радоватися:

⁸ вся знаема да будут господину нашему царю, яко пришедше во страну Иудейску и вшедше во Иерусалим град, обретохом от пленения старейшин Иудейских во Иерусалиме граде

⁹ созидающих дом Господу велик, нов от каменей тесаных драгих, полагающе древа в стенах,

¹⁰ и дела та с прилежанием творятся, и преспевает дело в руках их и во всей славе и прилежании совершается:

¹¹ тогда вопросихом старейшин оных, глаголюще: чиим повелением вы созидаете дом сей и дела та основаете?

¹² Вопросихом убо их, да ведомо сотворим тебе и напишем ти человек предстателей, и имен писания испросихом от оных предстателей:

¹³ тии же отвещаша нам, глаголюще: мы есмы раби Господа, иже сотвори небо и землю,

¹⁴ и созидашеся сей дом прежде лет многих от царя Израилева великаго и крепкаго, и совершися,

¹⁵ и понеже отцы наши прогневавше согрешиша к Богу Израилеву небесному, предаде их в руки Навуходоносора царя Вавилонскаго, царя Халдейска,

¹⁶ дом же той разоривше сожгоша и людий плениша в Вавилон:

¹⁷ в первое же лето царствующу Киру царю над страною Вавилонскою, писа царь Кир дом той созидати,

¹⁸ и священныя сосуды златыя и сребряныя, ихже изнесе Навуходоносор из дому, иже во Иерусалиме, и постави я во своем капищи, паки изнесе та Кир царь от храма, иже в Вавилоне и предаде их Зоровавелю и Санавассару воеводе,

¹⁹ и повелено бысть ему отнести вся сия сосуды и возложити во храм, иже во Иерусалиме, и храм Господень сей созидати на месте его:

²⁰ тогда Санавассар оный пришед, положи основания дому Господня, иже во Иерусалиме, и от онаго даже доныне зиждемый не прия совершения:

²¹ ныне убо, аще угодно тебе, о, царю, да поищется в царских книгохранилницах Кировых (яже в Вавилоне),

²² и аще обретено будет с повелением Кира царя бывшее строение дому Господня, иже во Иерусалиме, и судится от господина царя нашего, да возвестится о тех нам.

²³ Тогда царь Дарий повеле искати в царских книгохранилницах сущих в Вавилоне, и обретено бысть во Екватанех, во граде сущем во стране Мидийстей, место едино (в летописце), в немже написана бяху сия:

²⁴ в лето первое царствующу Киру, царь Кир повеле дом Господень, иже во Иерусалиме, созидати, идеже жряху огнем непрестанным,

²⁵ егоже высота лакот шестьдесят, широта лакот шестьдесят, с домами каменей тесаных треми и с домом древяным того места новым единым, и расходы даяти из дому Кира царя:

²⁶ и священныя сосуды дому Господня златыя же и сребряны, ихже взя Навуходоносор из дому (Господня), иже во Иерусалиме, и отнесе в Вавилон, возвратити в дом, иже во Иерусалиме, идеже бяху прежде, да поставятся тамо.

²⁷ Повеле же (царь) прилежати Сисиннию воеводе Сирийску и Финикийску и Сафравузану и клевретом его и учиненным в Сирии и Финикии началником, да не приступают к месту, оставят же отроку Господню Зоровавелю, началнику же Иудейскому, и старейшинам Иудейским дом Господень оный созидати на месте его.

²⁸ И аз повелех всячески созидати и прилежати, да помогают сущым от пленения Иудеом, дондеже совершится храм Господень:

²⁹ и от дани Килисирийския и Финикийския прилежно собрание даяти сим человеком на жертву Господню, Зоровавелю епарху, на юнцы и овны и агнцы,

³⁰ такожде и пшеницу и соль, и вино и елей, всегда на всяко лето, якоже священницы, иже во Иерусалиме, рекут иждивати на всяк день, без сомнения:

³¹ да приносятся возлияния Вышнему Богу за царя и отроки его, и да молят за их живот:

³² и да возвестится, елицы аще преступят что от предписанных или презрят, да возмется древо от своих ему, и на том да обесится, имения же его царю припишутся:

³³ сих ради и Господь, Егоже имя призывается тамо, да истребит всякаго царя и язык, иже руку свою прострет возбранити, или озлобити дом Господень оный, иже во Иерусалиме:

³⁴ аз царь Дарий повелех прилежно.