Библия на церковно-славянском языке - транслитерация современным русским алфавитом
(1751)

Послание апостола Павла Ефесянам

◄◄ | ◄ | Глава ⚫ | ► | ►►

¹ Павел, посланник Иисус Христов волею Божиею, святым сущым во Ефесе и верным о Христе Иисусе:

² благодать вам и мир от Бога Отца нашего и Господа Иисуса Христа.

³ Благословен Бог и Отец Господа нашего Иисуса Христа, благословивый нас всяцем благословением духовным в небесных о Христе.

⁴ Якоже избра нас в Нем прежде сложения мира, быти нам святым и непорочным пред Ним в любви,

⁵ прежде нарек нас во усыновление Иисус Христом в Него, по благоволению хотения Своего,

⁶ в похвалу славы благодати Своея, еюже облагодати нас о Возлюбленнем:

⁷ о Немже имамы избавление Кровию Его, и оставление прегрешении, по богатству благодати Его,

⁸ юже преумножил есть в нас во всяцей премудрости и разуме,

⁹ сказав нам тайну воли Своея по благоволению Своему, еже прежде положи в Нем,

¹⁰ в смотрение исполнения времен, возглавити всяческая о Христе, яже на небесех и яже на земли в нем:

¹¹ в Немже и наследницы сотворихомся, прежде наречени бывше по прозрению Божию вся Действующаго по совету воли Своея,

¹² яко быти нам в похваление славы Его, прежде уповавшым во Христа:

¹³ в Немже и вы, слышавше слово истины, благовествование спасения нашего, в Немже и веровавше знаменастеся Духом обетования Святым,

¹⁴ Иже есть обручение наследия нашего, во избавление снабдения, в похвалу славы Его.

¹⁵ Сего ради и аз слышав вашу веру о Христе Иисусе и любовь, яже ко всем святым,

¹⁶ не престаю благодаря о вас, поминание о вас творя в молитвах моих,

¹⁷ да Бог Господа нашего Иисуса Христа, Отец славы, даст вам Духа премудрости и откровения, в познание Его,

¹⁸ просвещенна очеса сердца вашего, яко уведети вам, кое есть упование звания Его, и кое богатство славы достояния Его во святых,

¹⁹ и кое преспеющее величество силы Его в нас верующих по действу державы крепости Его,

²⁰ юже содея о Христе, воскресив Его от мертвых и посадив одесную Себе на небесных,

²¹ превыше всякаго Началства и Власти и Силы и Господства, и всякаго имене именуемаго не точию в веце сем, но и во грядущем:

²² и вся покори под нозе Его, и Того даде главу выше всех Церкви,

²³ яже есть Тело Его, исполнение Исполняющаго всяческая во всех.