Бiблiя беларуская - пераклад Василя Сёмухи
(1995, Минск)

Экклезiяст

◄◄ | ◄ | Глава ⚫ | ► | ►►

¹ Слова Эклезіяста, сына Давідавага, цара ў Ерусаліме.

² Пустая марнасьць сказаў Эклезіяст, пустая марнасьць, - усё марнасьць!

³ Якая карысьць чалавеку ад усёй працы ягонай, якую ён робіць пад сонцам?

⁴ Пакаленьне прыходзіць, і пакаленьне праходзіць, а зямля векавечна стаіць.

⁵ Сонца ўзыходзіць, і сонца заходзіць і сьпяшаецца ў месца сваё, дзе ўстае.

⁶ Вее вецер на поўдзень і на поўнач вяртаецца, віруе, віхурыцца веючы, і на шлях віраваньня вяртаецца вецер.

⁷ Рэкі ўсе ў мора плывуць, а мора не перапаўняецца; да месца таго, адкуль рэкі плывуць, вяртаюцца зноў, каб далей пацячы.

⁸ Усё існае - поўніцца працай; ня можа ўсяго чалавек пакласьці на словы: не насыціцца бачаньнем вока; не напоўніцца слуханьнем вуха.

⁹ Што было, тое і будзе; што рабілася, тое й рабіцьмецца, і нічога новага пад сонцам няма.

¹⁰ Бывае такое, пра што людзі кажуць: "Дзівіся, вось гэта новае"; але яно ўжо было спрадвеку, да нас.

¹¹ Няма памяці пра былое; ды і пра тое, што будзе, не застанецца згадкі між тымі, што прыйдуць пасьля.

¹² Я, Эклезіяст, быў царом над Ізраілем у Ерусаліме.

¹³ І паклаў я на сэрца помысел мой, каб шукаць і дасьледаваць мудрасьцю ўсё, што пад небам робіцца: гэты прыкры занятак даў Бог сынам чалавечым, каб кіраваліся ім.

¹⁴ Я ўсе дзеі пабачыў, якія пад сонцам чыняцца, і вось, усё - марнасьць і пагоня за ветрам!

¹⁵ Крывое ня выпрастаецца, і чаго няма, таго нельга зьлічыць.

¹⁶ Гаварыў я з сэрцам маім і сказаў: вось, узьвялічыўся я і здабыў мудрасьці болей за ўсіх, што былі да мяне над Ерусалімам, і сэрца маё шмат нагледзела мудрасьці ўсякай і ведаў.

¹⁷ І паклаў я на сэрца помысел мой, каб мудрасьць уведаць, спасьцігнуць шаленства і неразумнасьць; спазнаў, што і гэта - пагоня за ветрам.

¹⁸ Бо пры многасьці мудрасьці множыцца й скруха; і хто памнажае спазнаньне, той памнажае і боль.