Библия на церковно-славянском языке - транслитерация современным русским алфавитом
(1751)

Екклесиаст

◄◄ | ◄ | Глава ⚫ | ► | ►►

¹ Что излишше человеку, яко кто весть, что благо человеку в животе (его) число дний живота суетства его? И сотвори я в сени: яко кто возвестит человеку, что будет по нем под солнцем?

² Благо имя паче елеа блага, и день смертный паче дня рождения его.

³ Благо ходити в дом плача, нежели ходити в дом пира, понеже сие конец всякому человеку, и живый даст благо в сердцы его.

⁴ Блага ярость паче смеха, яко во злобе лица ублажится сердце.

⁵ Сердце мудрых в дому плача, а сердце безумных в дому веселия.

⁶ Благо еже слышати прещение премудра, паче мужа слышащаго песнь безумных:

⁷ якоже глас терния под котлом, тако смех безумных. И сие суета.

⁸ Яко клевета льстит мудраго и погубляет сердце благородствия его.

⁹ Блага последняя словес паче начала его: благ терпеливый паче высокаго духом.

¹⁰ Не тщися в дусе своем яритися, яко ярость в недре безумных почиет.

¹¹ Да не речеши: что бысть, яко дние прежднии беша блази паче сих? Яко не в мудрости вопросил еси о сем.

¹² Блага мудрость с наследием, паче же видящым солнце:

¹³ яко в сени его мудрость, якоже сень сребра, и изюбилие разума премудрости оживляет, иже от нея.

¹⁴ Виждь творения Божия: яко кто может украсити, егоже аще Бог превратит?

¹⁵ В день благостыни (Его) живи во блазе и виждь в день зла: виждь, и с ним согласно сие сотвори Бог, о глаголании, да не обрящет человек за Ним ничтоже.

¹⁶ Всяческая видех во днех суетствия моего: есть праведный погибаяй во своей правде, и есть нечестивый пребываяй во своей злобе.

¹⁷ Не буди правдив вельми, ни мудрися излишше, да не когда изумишися.

¹⁸ Не нечествуй много и не буди жесток, да не умреши не во время свое.

¹⁹ Благо ти есть держатися сего, и от сего не оскверни руки твоея, яко боящымся Бога поспешатся вся.

²⁰ Премудрость поможет мудрому паче десяти обладающих во граде:

²¹ яко несть человек праведен на земли, иже сотворит благое и не согрешит.

²² И во вся словеса, яже возглаголют нечестивии, не вложи сердца своего, да не услышиши раба своего кленуща тебе:

²³ яко многажды возлукавнует на тя, и обхождении многими озлобит сердце твое, якоже и ты клял еси иныя (многия).

²⁴ Вся сия искусих в мудрости: рех, умудрюся: и сия удалися от мене

²⁵ далече паче неже бех, и бездны глубина, кто обрящет ю?

²⁶ Обыдох аз, и сердце мое, еже разумети, еже разсмотрити, и еже взыскати мудрость и разум, и еже разумети нечестиваго безумие и ожесточение и лесть:

²⁷ и обретох аз ю, и реку горчайшу паче смерти жену, яже есть ловитва, и сети сердце ея, узы в руку ея: благий пред лицем Божиим изимется от нея, а согрешаяй ят будет от нея.

²⁸ Се, сие обретох, рече Екклесиаст: едину единою еже обрести помысл, еже взыска душа моя, и не обретох:

²⁹ и человека единаго от тысящ обретох, а жены во всех сих не обретох:

³⁰ обаче се, сие обретох, еже сотвори Бог человека праваго, и сии взыскаша помыслов многих. Кто уведе мудрость? И кто весть разрешение глагола?