Библия на церковно-славянском языке - транслитерация современным русским алфавитом
(1751)

Екклесиаст

◄◄ | ◄ | Глава ⚫ | ► | ►►

¹ Не скор буди усты твоими, и сердце твое да не ускоряет износити слово пред лицем Божиим, яко Бог на небеси горе, ты же на земли долу: сего ради да будут словеса твоя мала:

² яко приходит соние во множестве попечения, тако и глас безумнаго во множестве словес.

³ Аще обещаеши обет Богу, не умедли отдати его, яко несть хотения в безумных: ты убо, елика аще обещаеши, отдаждь.

⁴ Благо тебе еже не обещаватися, нежели обещавшуся тебе, не отдати.

⁵ Не даждь устнам твоим еже во грех ввести плоть твою, и да не речеши пред лицем Божиим, яко неведение есть: да не прогневается Бог о гласе твоем и растлит творения рук твоих:

⁶ яко во множестве соний и суетствия, (тако) и словеса многа, темже Бога бойся.

⁷ Аще обиду нищаго и расхищение суда и правды увидиши во стране, не дивися о вещи: яко высокий над высоким надзиратель, и высоцыи над ними,

⁸ и изюбилие земли над всем есть царь села возделанна.

⁹ Любяй сребро не насытится сребра: и кто насладится во множестве его плода? И сие суета.

¹⁰ Во множестве блага умножишася ядущии е: и кое мужество имущему е? Яко начало еже видети очима своима.

¹¹ Сон сладок работающему, аще мало или много снесть: а насытившагося богатство не оставляет уснути.

¹² Есть недуг, егоже видех под солнцем, богатство хранимо от стяжателя во зло ему:

¹³ и погибнет богатство оно в попечении лукавне: и роди сына, и несть в руце его ничтоже:

¹⁴ якоже изыде из чрева матере своея наг, возвратится ити, якоже и прииде, и ничтоже возмет от труда своего, да понесет в руце своей.

¹⁵ И сие зол недуг: якоже бо прииде, тако и отидет, и кая польза ему, яко трудится на ветр?

¹⁶ Ибо вси дние его во тме и плачи и в ярости мнозе, и в недузе и во гневе.

¹⁷ Се, видех аз благое, еже есть изрядно, еже ясти и пити и видети благостыню во всем труде своем, имже трудился бы под солнцем, в число дний живота своего, яже дал есть ему Бог, яко сие часть его:

¹⁸ ибо всякому человеку, емуже дал есть Бог богатство и имения, и власть даде ему ясти от того и прияти часть свою и возвеселитися о труде своем, сие дар Божий есть:

¹⁹ яко не много памятствовати имать дни живота своего, понеже Бог облагает его попеченьми в веселии сердца его.