Библия на церковно-славянском языке - транслитерация современным русским алфавитом
(1751)

Екклесиаст

◄◄ | ◄ | Глава ⚫ | ► | ►►

¹ Рекох аз в сердцы моем: прииди убо, да тя искушу в веселии, и виждь во блазе: и се, такожде сие суетство.

² Смеху рекох: погрешение, и веселию: что сие твориши?

³ И разсмотрих, аще сердце мое повлечет аки вино плоть мою: и сердце мое настави мя в мудрости, и еже удержати веселие, дондеже увижду, кое благо сыном человеческим, еже творят под солнцем в число дний живота своего.

⁴ Возвеличих творение мое: создах ми домы, насадих ми винограды,

⁵ сотворих ми вертограды и сады и насадих в них древес всякаго плода,

⁶ сотворих ми купели водныя, еже напаяти от них прозябение древес:

⁷ притяжах рабы и рабыни, и домочадцы быша ми: и стяжание скота, и стад много ми бысть, паче всех бывших прежде мене во Иерусалиме:

⁸ собрах ми злато и сребро и имения царей и стран, сотворих ми поющих и поющыя, и услаждения сынов человеческих, виночерпцы и виночерпицы.

⁹ И возвеличихся, и приложихся мудрости паче всех бывших прежде мене во Иерусалиме: и мудрость моя пребысть со мною.

¹⁰ И все, егоже просиста очи мои, не отях от них и не возбраних сердцу моему от всякаго веселия моего, яко сердце мое возвеселися во всяцем труде моем. И сие бысть часть моя от всего труда моего.

¹¹ И призрех аз на вся творения моя, яже сотвористе руце мои, и на труд, имже трудихся творити. И се, вся суета и произволение духа, и несть изюбилие под солнцем.

¹² И призрех аз видети мудрость, лесть и безумие: яко кто человек, иже пойдет вслед совета, елика сотвори в нем?

¹³ И видех аз, яко есть изюбилие мудрости паче безумия, якоже изюбилие света паче тмы:

¹⁴ мудраго очи его во главе его, а безумный во тме ходит: и уведех и аз, яко случай един случится всем им.

¹⁵ И рех аз в сердцы моем: якоже случай безумнаго, и мне случится: и вскую умудрихся? Аз тогда излишше глаголах в сердцы моем, яко и сие суета, понеже безумный от избытка глаголет:

¹⁶ яко несть памяти мудраго с безумным во век, зане уже во днех грядущих вся забвена быша: и како умрет мудрый с безумным?

¹⁷ И возненавидех живот, яко лукавно мне сотворение сотворенное под солнцем: понеже всяческая суета и произволение духа.

¹⁸ И возненавидех аз всяческая мира и труд мой, имже аз труждаюся под солнцем, яко оставляю его человеку будущему по мне.

¹⁹ И кто весть, мудр ли будет или безумен? И обладати ли имать всем трудом моим, имже трудихся и имже мудрствовах под солнцем? И сие же суета.

²⁰ И обратихся аз отрещися сердцу моему о всем труде, имже трудихся под солнцем:

²¹ яко есть человек, егоже труд в мудрости и в разуме и в мужестве: и человек, иже не потрудися о нем, даст ему часть свою. И сие суета и лукавство велие.

²² Яко бывает человеку во всем труде его и в произволении сердца его, имже той труждается под солнцем,

²³ яко вси дние его болезней и ярости попечение ему, ибо в нощи не спит сердце его. И сие же суета есть.

²⁴ Несть благо человеку, но (разве) еже яст и пиет и еже покажет души своей благо в труде своем: и сие видех аз, яко от руки Божия есть:

²⁵ яко кто яст и пиет кроме Его?

²⁶ Яко человеку благу пред лицем Его даде мудрость и разум и веселие, согрешающему же даде попечение, еже прилагати и собирати, во еже дати благому пред лицем Божиим: яко и сие суета и произволение духа.