Библия на церковно-славянском языке - транслитерация современным русским алфавитом
(1751)

Пятая книга Моисеева Второзаконие

◄◄ | ◄ | Глава ⚫ | ► | ►►

¹ И сие благословение, имже благослови Моисей человек Божий сыны Израилевы прежде скончания своего,

² и рече: Господь от Синаи прииде, и явися от Сиира нам, и приспе от горы Фарани, и прииде со тмами святых, одесную Его ангели с ним,

³ и пощаде люди Своя: и вси освященнии под руками Твоими, и сии под Тобою суть.

⁴ И прия от словес Его закон, егоже заповеда нам Моисей, наследие сонму Иаковлю:

⁵ и будет в Возлюбленнем князь, собравшымся князем людским купно с племены Израилевыми.

⁶ Да живет Рувим, и да не умрет, и Симеон да будет мног числом.

⁷ И сие Иуде: услыши, Господи, глас Иудин и в люди его вниди: руце его поборют по нем, и помощник на враги его да будеши.

⁸ И Левию рече: дадите Левию явленная Его, и истину Его мужу преподобну, егоже искусиша Искушением, укориша его у воды Пререкания:

⁹ глаголяй отцу своему и матери своей: не видех тебе: и братии своея не позна, и сынов своих не уведе: сохрани словеса Твоя и завет Твой соблюде:

¹⁰ явят оправдания Твоя Иакову и закон Твой Израилю: возложат фимиам во гневе Твоем всегда на олтарь Твой:

¹¹ благослови, Господи, крепость его и дела руку его приими: порази чресла воставших на него врагов его, и ненавидящии его да не востанут.

¹² И Вениамину рече: возлюбленный Господем уповаяй вселится (в Нем), и Бог осеняет его во вся дни, и посреде рамен Его почи.

¹³ И Иосифови рече: от благословения Господня земля его, от красот небесных и росы, и от бездн источников низу,

¹⁴ и во время плодов солнечных обращений, и от схождений месячных,

¹⁵ и от верха гор начала, и от верха холмов вечных,

¹⁶ и по времени земли исполнения: и приятная Явившемуся в купине, да приидут на главу Иосифу, и на версе прославивыйся в братии.

¹⁷ Первородный юнца доброта его, рози единорога рози его: ими языки избодет вкупе даже до края земли: сия тмы Ефремовы, и сия тысящи Манассиины.

¹⁸ И Завулону рече: возвеселися, Завулоне, во исходе твоем, и Иссахаре в селениих твоих:

¹⁹ языки потребят: и призовете тамо, и пожрете тамо жертву правды: яко богатство морское воздоит тя, и купли от язык при мори живущих.

²⁰ И Гаду рече: благословен разширяяй Гада: яко лев почи, сокрушивый мышцу и князя:

²¹ и виде начатки своя, яко тамо разделися земля, князей собранных вкупе с началники людскими: правду Господь сотвори и суд Свой со Израилем.

²² И Дану рече: Дан, скимен львов, и изскочит от Васана.

²³ И Неффалиму рече: Неффалиму насыщение приятных, и да насытится благословением от Господа: море и юг наследит.

²⁴ И Асиру рече: благословен от чад Асир, и будет приятен братии своей: омочит в елей ногу свою:

²⁵ железо и медь сапог его будет, и аки дни твоя крепость твоя.

²⁶ Несть якоже Бог Возлюбленнаго: восходяй на небо помощник твой, и великолепый в тверди:

²⁷ и покрыет тя Божие начало, и под крепостию мышцей вечных: и отженет от лица твоего врага, глаголя: да погибнеши:

²⁸ и вселится Израиль уповая един на земли Иаковли в вине и пшенице: и небо ему облачно росою.

²⁹ Блажен еси, Израилю: кто подобен тебе, людие спасаемии от Господа? Защитит помощник твой, и мечь хвала твоя: и солжут тебе врази твои, и ты на выю их наступиши.