Бiблiя беларуская - пераклад Василя Сёмухи
(1995, Минск)

1-е Карынфянаў

◄◄ | ◄ | Глава ⚫ | ► | ►►

¹ І я ня мог гутарыць з вамі, браты, як з духоўнымі, а як з плоцкімі, як зь немаўляткамі ў Хрысьце.

² Я ўзгадаваў вас малаком, а ня цьвёрдаю ежаю; бо вы яшчэ не маглі есьці яе, ды і цяпер яшчэ ня можаце.

³ Бо вы яшчэ плоцкія. Бо, калі паміж вамі зайздрасьць, звады і несугалосіца, дык ці ж ня плоцкія вы? і ці ня па людзкім звычаі робіце?

⁴ Бо, калі адзін кажа: "Я Паўлаў", а другі: "я Апалосаў", дык ці ж ня плоцкія вы?

⁵ Хто Павал? хто Апалос? Яны толькі слугі, празь якіх вы ўверавалі, і пры тым як каму даў Гасподзь.

⁶ Я пасадзіў, Апалос паліваў, а ўзрасьціў Бог;

⁷ а таму і той, хто садзіць, і хто палівае, ёсьць нішто, а ўсё Бог, Які дае рост.

⁸ І хто садзіць і хто палівае - адно; але кожны атрымае сваю ўзнагароду паводле сваёй працы.

⁹ Бо мы супрацоўнікі ў Бога; а вы Божая ніва, Божая будова.

¹⁰ Я, па дадзенай мне ад Бога мілаце, як мудры будаўнік, заклаў падмурак, а другі будуе на ім: але кожны ўважай, як будуе.

¹¹ Бо ніхто ня можа закласьці іншага падмурка, акрамя закладзенага, які ёсьць Ісус Хрыстос.

¹² Ці будуе хто на гэтым падмурку з золата, срэбра, каштоўных камянёў, дрэва, сена, саломы,

¹³ дзея кожнага выявіцца: бо дзень пакажа; таму што ў вагні выкрываецца, і вагонь выпрабоўвае дзею кожнага, якая яна ёсьць.

¹⁴ У каго дзея, якую ён будаваў, выстаіць, той атрымае ўзнагароду;

¹⁵ а ў каго дзея згарыць, той мецьме шкоду; урэшце сам уратуецца, але так, як бы з вагню.

¹⁶ Хіба ня ведаеце, што вы храм Божы, і Дух Божы жыве ў вас?

¹⁷ Калі хто абкрадзе сьвятыню Божую, таго пакарае Бог, бо сьвятыня Божая сьвятая; і гэтая сьвятыня - вы.

¹⁸ Ніхто не ашуквай сам сябе; калі хто з вас думае быць мудрым у веку гэтым, той хай будзе неразумны, каб быць мудрым.

¹⁹ Бо мудрасьць сьвету гэтага ёсьць неразумнасьць перад Богам, як напісана: "ловіць мудрых у хітрасьці іхняй".

²⁰ І яшчэ: "Гасподзь ведае мудрошчы мудрацоў, што яны марныя".

²¹ Таму вось, няхай ніхто ня хваліцца людзьмі, бо ўсё вашае:

²² ці то Павал, ці Апалос, ці Кіфа, ці сьвет, ці жыцьцё, ці сьмерць, ці цяпершчына, а ці наступнае, - усё ваша;

²³ а вы - Хрыстовыя, а Хрыстос - Божы.