Бiблiя беларуская - пераклад Василя Сёмухи
(1995, Минск)

1-е Карынфянаў

◄◄ | ◄ | Глава ⚫ | ► | ►►

¹ Не хачу пакідаць вас, браты, каб ня ведалі вы і пра дары духоўныя.

² Ведаеце, што, калі вы былі язычнікамі, дык хадзілі да безгалосых ідалаў - так, быццам вялі вас.

³ Таму маўляю вам, што ніхто, гаворачы ў Духу Божым, ня вымавіць анафэмы на Ісуса, і ніхто ня можа назваць Ісуса Госпадам, як толькі ў Духу Сьвятым.

⁴ Дары ёсьць розныя, а Дух адзін і той самы;

⁵ і служэньні розныя, а Гасподзь адзін і той самы;

⁶ і дзеяньні розныя, а Бог адзін і той самы, Які дзее ўсё ва ўсіх.

⁷ Але кожнаму даецца выяўленьне Духа на карысьць:

⁸ аднаму даецца Духам слова мудрасьці, другому слова веданьня, тым самым Духам;

⁹ іншаму вера, тым самым Духам; іншаму дар ацаленьня, тым самым Духам;

¹⁰ іншаму цудадзействы, іншаму прароцтва, іншаму распазнаньне духаў, іншаму розныя мовы, іншаму тлумачэньне моваў.

¹¹ А ўсё гэта дзее адзін і той самы Дух, надзяляючы кожнага асобна, як Яму заўгодна.

¹² Бо, як цела адно, але мае многа чэлесаў, і ўсе чэлесы аднаго цела, хоць іх многа, складаюць адно цела, - так і Хрыстос.

¹³ Бо ўсе мы адным Духам хрысьціліся ў адно цела, Юдэі альбо Эліны, рабы альбо вольнікі, і ўсе напоены адным Духам.

¹⁴ А цела не з аднаго чэлеса, а з многіх.

¹⁵ Калі нага кажа: я не належу да цела, бо я ня рука, дык няўжо яна таму не належыць да цела?

¹⁶ І калі вуха скажа: я не належу да цела, бо я ня вока, дык няўжо яно таму не належыць да цела?

¹⁷ Калі ўсё цела - вока, дык дзе слых? Калі ўсё - слых, дык дзе нюх?

¹⁸ Бог разьмеркаваў чэлесы, кожнаму ў целе, як Яму было заўгодна.

¹⁹ А калі б усе былі адным чэлесам, дык дзе было б цела?

²⁰ А цяпер чэлесаў многа, а цела адно.

²¹ Ня можа вока сказаць руцэ: ты мне не патрэбная; альбо ж таксама галава нагам: вы мне не патрэбныя.

²² Наадварот, чэлесы цела, якія здаюцца слабейшымі, намнога больш патрэбныя,

²³ і якія нам здаюцца меней высакароднымі ў целе, іх мы якраз і атачаем найбольшым дбаньнем;

²⁴ і няпрыстойныя нашыя чэлесы патрабуюць асаблівага ўпрыстойваньня, а прыстойныя нашыя чэлесы ня маюць патрэбы ў гэтым. Але Бог так суразьмерыў цела, што менш дасканаламу чэлесу наказаў большае дбаньне,

²⁵ каб ня было падзелу ў целе, а ўсе чэлесы аднолькава рупіліся адзін пра аднаго.

²⁶ Таму, калі пакутуе адзін чэлес, пакутуюць разам зь ім усе чэлесы; славіцца адзін чэлес, зь ім радуюцца ўсе чэлесы.

²⁷ І вы - цела Хрыстовае, а паасобку - чэлесы.

²⁸ І адных Бог паставіў у Царкве, па-першае, апосталамі, па-другое, прарокамі, па-трэйцяе, настаўнікамі; далей адным даў сілу цудадзейную, таксама дары ацаленьня, дапамогі, кіраваньня, розныя мовы.

²⁹ Ці ўсе апосталы? ці ўсе прарокі? ці ўсе настаўнікі? ці ўсе цудадзеі?

³⁰ ці ўсе маюць дар ацаленьня? ці ўсе гавораць мовамі? ці ўсе тлумачаць?

³¹ Дбайце пра дары большыя, і я пакажу вам шлях яшчэ лепшы.