Бiблiя беларуская - пераклад Василя Сёмухи
(1995, Минск)

Да Каласянаў

◄◄ | ◄ | Глава ⚫ | ► | ►►

¹ І вось, калі вы ўваскрэсьлі з Хрыстом, дык шукайце вышыняў, дзе Хрыстос сядзіць праваруч Бога;

² пра вышыннае думайце, а не пра зямное.

³ Бо вы памерлі, і жыцьцё ваша схавана з Хрыстом у Богу;

⁴ калі зьявіцца Хрыстос, жыцьцё вашае, тады і вы зьявіцеся зь Ім у славе.

⁵ Дык жа ўмярцьвеце зямныя чэлесы вашыя: распусту, нечысьць, юр, ліхую хцівасьць і любазьдзірства, якое ёсьць ідаласлужэньне,

⁶ за якія гнеў Божы ідзе на сыноў супраціву,

⁷ у якіх і вы колісь блукалі, калі жылі сярод іх.

⁸ А зараз вы адкладзеце ўсё: гнеў, лютасьць, злосьць, ліхаслоўе, кляцьбу з вуснаў вашых;

⁹ ня хлусеце адно аднаму, бо вы распранулі зь сябе старога чалавека зь дзеямі ягонымі

¹⁰ і, апрануўшыся ў новага, які абнаўляецца ў пазнаньні паводле вобраза Стваральніка ягонага,

¹¹ дзе няма ні Эліна, ні Юдэя, ні абразаньня, ні неабразаньня, варвара, Скіфа, раба, вольніка, а ўсё і ўва ўсім - Хрыстос.

¹² Дык апранецеся, як выбранцы Божыя, сьвятыя і ўлюбёнцы, у міласэрнасьць, даброць, мудрую пакору, лагоднасьць, доўгую цярплівасьць,

¹³ паблажаючы адно аднаму і даруючы ўзаемна, калі хто на каго мае крыўду: як Хрыстос дараваў вам, так і вы.

¹⁴ а найболей апранецеся ў любоў, якая ёсьць сукупнасьць дасканаласьці;

¹⁵ і няхай валадарыць у сэрцах вашых мір Божы, да якога вы і пакліканы ў адным целе; і будзьце прыязныя.

¹⁶ Слова Хрыстовае хай усяляецца ў вас шчодра, з усякаю мудрасьцю; вучэце і настаўляйце на розум адзін аднаго псальмамі, славаслоўем і духоўнымі песьнямі, у мілаце апяваючы ў сэрцах вашых Госпада.

¹⁷ І ўсё, што вы робіце словам ці ўчынкам, усё рабеце ў імя Госпада Ісуса Хрыста, дзякуючы празь Яго Богу і Айцу.

¹⁸ Жонкі, упакорвайцеся мужам сваім, як прыстойна гэта ў Госпадзе.

¹⁹ Мужы, кахайце сваіх жонак і ня будзьце зь імі суровыя.

²⁰ Дзеці, слухайцеся бацькоў вашых ва ўсім, бо гэта даспадобы Госпаду.

²¹ Бацькі, не дакучайце дзецям вашым, каб яны не падалі духам.

²² Рабы, ва ўсім упакорвайцеся гаспадарам вашым па плоці, не для выгляду (толькі) служачы ім, не каб дагадзіць, а ў шчырасьці богабаязнага сэрца.

²³ І ўсё, што робіце, рабеце ад душы, як Госпаду, а не чалавеку,

²⁴ ведаючы, што ў аддзяку ад Госпада дастанеце спадчыну; бо вы служыце Госпаду Хрысту.

²⁵ А хто несправядліва ўчыніць, той атрымае паводле сваёй няпраўды, у Яго няма агляду на асобы.