Библия на церковно-славянском языке - транслитерация современным русским алфавитом
(1751)

Вторая книга Паралипоменон

◄◄ | ◄ | Глава ⚫ | ► | ►►

¹ И бысть по двадесяти летех, в нихже созда Соломон дом Господень и дом свой,

² и грады яже даде Хирам Соломону, созда оны Соломон и всели ту сыны Израилевы.

³ И прииде Соломон во Емаф-Сува и одержа его.

⁴ И созда Федмор в пустыни и вся грады крепкия, яже созда во Емафе.

⁵ Сострои же Вефорон вышний и Вефорон нижний, грады укреплены стенами, вратами и вереями:

⁶ и Валааф, и вся грады крепкия, иже быша Соломону, и вся грады колесниц и грады конник, и елика восхоте Соломон по желанию создати бо Иерусалиме и в Ливане и во всем царстве своем.

⁷ Весь народ оставшийся от Хеттеа и Аморреа, и Ферезеа и Евеа и Иевусеа, иже не бяху от племене Израилева,

⁸ но беша от сынов их оставшихся по них на земли, ихже не избиша сынове Израилевы, подведе их Соломон в дань даже до дне сего.

⁹ От сынов же Израилевых не даде Соломон в рабы царству своему: тии бо бяху мужие ратницы и князи, и сильнии и началницы колесниц и конник его.

¹⁰ И сии началницы предстоящих царю Соломону, двести пятьдесят приставницы над делы людскими.

¹¹ Дщерь же Фараоню преведе Соломон от града Давидова в дом, егоже созда ей, рече бо: да не обитает жена моя в дому Давида царя Израилева, понеже освящен есть, аможе вниде кивот Господень.

¹² Тогда вознесе Соломон всесожжения Господеви на олтарь, егоже созда Господеви пред храмом,

¹³ по словеси от дне до дне возносити, по повелению Моисееву, в субботы и в новомесячия и в праздники, трижды в год, в праздник опресноков и в праздник седмиц и в праздник кущей.

¹⁴ И постави по разсуждению Давида отца своего разделения священником и по служением их: и левиты над стражами их, да хвалят и служат пред священники по чину единаго коегождо дний: и дверницы по разделением их, по вратом и вратом: тако бо повеле Давид человек Божий.

¹⁵ Не преступиша заповедий царевых о священницех и левитех по всякому словеси, и в сокровищих.

¹⁶ И уготовася всяко делание от дне, в оньже основа, до дне, в оньже соверши Соломон дом Господень.

¹⁷ Тогда иде Соломон в Гасионъгавер и во Елаф, иже при мори в земли Идумейстей.

¹⁸ И посла Хирам рукою слуг своих корабли и рабы знающыя морския проходы, и хождаху с рабы Соломоними в Софир, и взяша оттуду четыреста и пятьдесят талант злата и принесоша ко царю Соломону.