Библия на церковно-славянском языке - транслитерация современным русским алфавитом
(1751)

Вторая книга Паралипоменон

◄◄ | ◄ | Глава ⚫ | ► | ►►

¹ Азариа же сын Ададов, бысть на нем Дух Божий:

² и изыде во сретение Асе и всему Иуде и Вениамину и рече ему: услышите мя, Аса и весь Иуда и Вениамин: Господь с вами, яко бысте с Ним: и аще взыщете Его, обрящется вам, аще же оставите Его, оставит вас:

³ мнози дние (будут) во Израили без Бога истиннаго и без священника учащаго и без закона:

⁴ егда же обратятся в печали ко Господу Богу Израилеву и взыщут Его, и обрящется им:

⁵ и во время оно не будет мир исходящему и входящему, яко ужас Господень на всех обитающих на земли

⁶ и ополчится язык на язык и град противу града, яко Господь смутит их во всяцей печали:

⁷ и вы укрепитеся, и да не ослабеют руки вашя, есть бо мзда делу вашему.

⁸ И егда услыша Аса словеса сия и пророчество Азарии пророка, укрепися и отя вся идолы от всея земли Иудины и Вениамини и от градов, ихже содержаше Иеровоам в горе Ефремли, и освяти олтарь Господень, иже бе пред храмом Господним:

⁹ собра же (всего) Иуду и Вениамина и пришелцев обитающих с ним от Ефрема и от Манассии и от Симеона, мнози бо к нему прибегоша от Израиля, егда увидеша, яко Господь Бог его с ним.

¹⁰ И собрашася во Иерусалим в месяц третий, в лето пятоенадесять царства Асы,

¹¹ и пожроша Господу в день той от корыстей, ихже приведоша, волов седмь сот и овец седмь тысящ,

¹² и поидоша в завете, еже искати Господа Бога отец своих всем сердцем и всею душею своею:

¹³ и (рече): всяк, иже аще не взыщет Господа Бога Израилева, да умрет от юнаго даже до старейшаго, от мужа даже до жены.

¹⁴ И кляшася Господу гласом великим в восклицании и в трубах и в рожаных.

¹⁵ И возрадовася весь Иуда о клятве, яко от всея души кляшася, и всею волею взыскаша Его, и обретеся им, и даде им Господь покой окрест.

¹⁶ И Мааху матерь свою отлучи, да не служит Астарту, и сокруши идола и сожже в потоце Кедрстем.

¹⁷ Токмо высоких не отстави, еще бо бяху во Израили, но сердце Асы бе совершенно во всех днех его:

¹⁸ и внесе святая Давида отца своего и святая своя в дом Божий, сребро и злато и сосуды.

¹⁹ И брань не бысть ему даже до тридесять пятаго лета царства Асина.