Бiблiя беларуская - пераклад Василя Сёмухи
(1995, Минск)

1-я Летапiсаў

◄◄ | ◄ | Глава ⚫ | ► | ►►

¹ Давід, састарыўшыся і насыціўшыся жыцьцём, паставіў царом над Ізраілем сына свайго Саламона.

² І сабраў усіх князёў Ізраілевых і сьвятароў і лявітаў,

³ і палічаны былі лявіты, ад трыццаці гадоў і вышэй, і было лікам іх, лічачы пагалоўна, трыццаць восем тысяч чалавек.

⁴ Зь іх прызначаны для дзеі ў доме Гасподнім дваццаць чатыры тысячы, а пісцоў і судзьдзяў шэсьць тысяч,

⁵ і чатыры тысячы брамнікаў, і чатыры тысячы тых, што праслаўляюць Госпада на музычных спарудах, якія ён зрабіў для праслаўленьня.

⁶ І падзяліў іх Давід на чароды па сынах Левія - Гірсоне, Кааце і Мэрары.

⁷ З Гірсанянаў - Лаэдан і Шымэй.

⁸ Сыны Лаэдана: першы Ехііл, Зэтам і Ёіль, трое.

⁹ Сыны Шымэя: Шыламіт, Хазііл і Гаран, трое. Яны ўзначальцы пакаленьняў Лаэданавых.

¹⁰ Яшчэ сыны Шымэя: Яхат, Зіза, Еўш і Бэрыя. Гэта сыны Шымэя, чацьвёра.

¹¹ Яхат быў галоўны, Зіта другі; Еўш і Бэрыя мелі дзяцей ня многа, і таму яны былі ў адным ліку пры доме бацькавым.

¹² Сыны Каата: Амрам, Іцгар, Хэўрон і Азііл, чацьвёра.

¹³ Сыны Амрама: Аарон і Майсей. Аарон аддзелены быў на прысьвячэньне да Сьвятога Сьвятых, ён і сыны ягоныя, навечна, каб учыняць дымленьне прад абліччам Госпада, каб служыць Яму і дабраслаўляць імем Ягоным навекі.

¹⁴ А Майсей, чалавек Божы і сыны ягоныя залічаны да калена Лявіінага.

¹⁵ Сыны Майсея: Гірсон і Эліезэр.

¹⁶ Сыны Гірсона: першы быў Шэвуіл.

¹⁷ Сыны Эліезра былі: першы Рэхавія. І ня было ў Эліезэра другіх сыноў; у Рэхавіі ж было вельмі многа сыноў.

¹⁸ Сыны Іцгара: першы Шэломіт.

¹⁹ Сыны Хэўрона: першы Ерыя і другі Амарыя, трэці Яхазііл і чацьвёрты Екамам.

²⁰ Сыны Азііла: першы Міха і другі Ішыя.

²¹ Сыны Мэрарыны: Махлі і Мушы. Сыны Махлія: Элеазар і Кіс.

²² І памёр Элеазар, і ня было ў яго сыноў, а толькі дочкі; і ўзялі іх за сябе сыны Кіса, браты іхнія.

²³ Сыны Мушыя: Махлі, Эдэр і Ірэмот - трое.

²⁴ Вось сыны Лявііны, па дамах бацькоў іхніх, узначальцы сямействаў, па імянным зьлічэньні іхнім пагалоўна, якія спраўлялі дзеі служэньня ў доме Гасподнім, ад дваццаці гадоў і вышэй.

²⁵ Бо Давід сказаў: Гасподзь Бог Ізраілеў даў спакой народу Свайму і паставіў яго ў Ерусаліме навекі.

²⁶ і лявітам ня трэба насіць скінію і ўсялякія рэчы яе дзеля служэньня ў ёй.

²⁷ Таму, паводле апошніх загадаў Давіда, палічаны лявіты ад дваццаці гадоў і вышэй,

²⁸ каб яны былі пры сынах Ааронавых, дзеля служэньня дому Гасподняму, у двары і ў прыбудовах, дзеля падтрыманьня чысьціні ўсёй сьвятыні і дзеля выкананьня ўсялякай службы пры доме Божым

²⁹ дзеля назіраньня за хлябамі пакладнымі і пшанічнаю мукою для хлебнага прынашэньня і праснакамі, за печаным, смажаным і за ўсякаю мераю і вагою,

³⁰ і каб станавіліся кожнае раніцы дзякаваць і славасловіць Госпада, таксама і ўвечары,

³¹ і пры ўсіх цэласпаленьнях, якія ўзносяцца Госпаду ў суботы, на маладзіка і ў сьвяты па ліку, як прадпісана пра іх, - пастаянна прад абліччам Госпада,

³² і каб ахоўвалі скінію адкрыцьця і сьвятыню і сыноў Ааронавых, братоў сваіх, пры службах дому Гасподняму.