Сборник священных книг иудаизма - הסֵפֵרים (hа-сэфэрим) или תנך (танах)
(XIII-V века до н.э.)

דּבְרֵי הַיָּמִים («Дибрéй hайамúм» - слова дней) א

◄◄ | ◄ | Глава ⚫ | ► | ►►

¹ וַיְהִי לְעֵת תְּשׁוּבַת הַשָּׁנָה לְעֵת צֵאת הַמְּלָכִים, וַיִּנְהַג יוֹאָב אֶת־חֵיל הַצָּבָא וַיַּשְׁחֵת אֶת־אֶרֶץ בְּנֵי־עַמּוֹן, וַיָּבֹא וַיָּצַר אֶת־רַבָּה, וְדָוִיד יֹשֵׁב בִּירוּשָׁלִָם; וַיַּךְ יוֹאָב אֶת־רַבָּה וַיֶּהֶרְסֶהָ׃

² וַיִּקַּח דָּוִיד אֶת־עֲטֶרֶת־מַלְכָּם מֵעַל רֹאשׁוֹ וַיִּמְצָאָהּ מִשְׁקַל כִּכַּר־זָהָב, וּבָהּ אֶבֶן יְקָרָה, וַתְּהִי עַל־רֹאשׁ דָּוִיד; וּשְׁלַל הָעִיר הוֹצִיא הַרְבֵּה מְאֹד׃

³ וְאֶת־הָעָם אֲשֶׁר־בָּהּ הוֹצִיא, וַיָּשַׂר בַּמְּגֵרָה וּבַחֲרִיצֵי הַבַּרְזֶל וּבַמְּגֵרוֹת, וְכֵן יַעֲשֶׂה דָוִיד, לְכֹל עָרֵי בְנֵי־עַמּוֹן; וַיָּשָׁב דָּוִיד וְכָל־הָעָם יְרוּשָׁלִָם׃    פ

⁴ וַיְהִי אַחֲרֵיכֵן, וַתַּעֲמֹד מִלְחָמָה בְּגֶזֶר עִם־פְּלִשְׁתִּים; אָז הִכָּה סִבְּכַי הַחֻשָׁתִי, אֶת־סִפַּי מִילִדֵי הָרְפָאִים וַיִּכָּנֵעוּ׃

⁵ וַתְּהִי־עוֹד מִלְחָמָה אֶת־פְּלִשְׁתִּים; וַיַּךְ אֶלְחָנָן בֶּן־יָעוּר (יָעִיר), אֶת־לַחְמִי אֲחִי גָּלְיָת הַגִּתִּי, וְעֵץ חֲנִיתוֹ, כִּמְנוֹר אֹרְגִים׃

⁶ וַתְּהִי־עוֹד מִלְחָמָה בְּגַת; וַיְהִי אִישׁ מִדָּה, וְאֶצְבְּעֹתָיו שֵׁשׁ־וָשֵׁשׁ עֶשְׂרִים וְאַרְבַּע, וְגַם־הוּא נוֹלַד לְהָרָפָא׃

⁷ וַיְחָרֵף אֶת־יִשְׂרָאֵל; וַיַּכֵּהוּ יְהוֹנָתָן, בֶּן־שִׁמְעָא אֲחִי דָוִיד׃

⁸ אֵל נוּלְּדוּ לְהָרָפָא בְּגַת; וַיִּפְּלוּ בְיַד־דָּוִיד וּבְיַד־עֲבָדָיו׃    פ