Бiблiя беларуская - пераклад Василя Сёмухи
(1995, Минск)

1-я Летапiсаў

◄◄ | ◄ | Глава ⚫ | ► | ►►

¹ І сабраліся ўсе Ізраільцяне да Давіда ў Хэўрон і сказалі: вось, мы костка твая і плоць твая;

² і ўчора і заўчора, калі яшчэ Саўл быў царом, ты выводзіў і ўводзіў Ізраіля, і Гасподзь Бог твой сказаў табе: ты будзеш пасьвіць народ Мой Ізраіля і ты будзеш правадыр народу Майго Ізраіля.

³ І прыйшлі ўсе старэйшыны Ізраілевыя да цара ў Хэўрон, і заключыў зь імі Давід запавет у Хэўроне перад абліччам Гасподнім: і яны памазалі Давіда ў цара над Ізраілем, па слове Гасподнім, праз Самуіла.

⁴ І пайшоў Давід і ўвесь Ізраіль да Ерусаліма, гэта значыць, да Евуса. А там былі Евусэі, жыхары той зямлі.

⁵ І сказалі жыхары Евуса Давіду: ня ўвойдзеш сюды. Але Давід узяў крэпасьць Сіён: гэта - горад Давідаў.

⁶ І сказаў Давід: хто першы за ўсіх паб'е Евусэяў, той будзе галавою і ваенным начальнікам. І ўзышоў самы першы Ёаў, сын Саруі, і зрабіўся ўзначальцам.

⁷ Давід жыў у той крэпасьці, таму і называлі яе горадам Давідавым.

⁸ І ён забудаваў горад навакол, ад Міло, усю ваколіцу, а Ёаў аднавіў астатні горад.

⁹ І меў посьпех Давід, і ўзвышаўся больш і больш, і Гасподзь Саваоф быў зь ім.

¹⁰ Вось галоўныя мацакі ў Давіда, якія многа супрацоўнічалі зь ім у царстве ягоным, разам з усім Ізраілем, каб паставіць яго царом, па слове Гасподнім, над Ізраілем,

¹¹ і вось лік мацакоў, якія былі ў Давіда: Есваал, сын Ахамані, галоўны з трыццаці: ён падняў дзіду сваю на трыста чалавек і пабіў іх за адзін раз.

¹² Пасьля яго Элеазар, сын Дадо Ахахэяніна, адзін з трох мацакоў:

¹³ ён быў з Давідам у Фасдаміме, куды Філістымляне сабраліся на вайну. Там частка поля была засеяна ячменем, і народ пабег ад Філістымлянаў;

¹⁴ але яны сталі сярод поля, убераглі яго і пабілі Філістымлянаў. І дараваў Гасподзь выратаваньне вялікае!

¹⁵ Трое гэтых галоўных з трыццаці правадыроў падняліся на скалу да Давіда, у пячору Адалам, калі табар Філістымлянаў быў разьмешчаны ў даліне Рэфаімавай.

¹⁶ Давід тады быў ва ўмацаваным месцы, а ахоўнае войска Філістымлянаў было тады ў Віфляеме.

¹⁷ І моцна захацелася піць Давіду, і ён сказаў: хто напоіць мяне вадою з калодзежа Віфляемскага, што каля брамы?

¹⁸ Тады гэтыя трое прабіліся праз табар Філістымскі і зачарпнулі вады з калодзежа Віфляемскага, што каля брамы, і ўзялі, і прынесьлі Давіду. Але Давід не захацеў піць яе і выліў яе ў славу Госпада,

¹⁹ і сказаў: аслані мяне Гасподзь, каб я зрабіў гэта! Ці ж буду я піць кроў мужоў гэтых, якія клалі душы свае? Бо зь небясьпекай свайму жыцьцю яны прынесьлі ваду. І не захацеў піць яе. Вось што зрабілі гэтыя тры мацакі.

²⁰ І Авэса, брат Ёава, быў галоўны з трох: ён забіў дзідай сваёй трыста чалавек, і быў у славе ў тых трох.

²¹ З трох ён быў самы знакаміты і быў начальнікам; але з тымі трыма не раўняўся.

²² Ванэя, сын Ёдая, мужа адважнага, вялікі па дзеях, з Каўцэпла: ён пабіў двух сыноў Арыіла Маавіцкага; ён жа сышоў і забіў ільва ў рове, у сьнежны час;

²³ ён жа забіў Егіпцяніна, чалавека ростам у пяць локцяў: у руцэ ў Егіпцяніна была дзіда, як навой у ткачоў, а ён падышоў да яго з кіем і, вырваўшы дзіду з рукі Егіпцяніна, забіў ягонай жа дзідай:

²⁴ вось, што зрабіў Ванэя, сын Ёдая, і ён быў у славе ў тых трох мацакоў;

²⁵ ён быў больш знакаміты за тых трыццацёх, але з трыма не раўняўся, і Давід паставіў яго бліжэйшым выканаўцам сваіх загадаў.

²⁶ А галоўныя з воінаў: Асаіл, брат Ёава: Элханан, сын Дадо, зь Віфляема;

²⁷ Шама Гарадыцянін; Хэрэц Пэланіцянін;

²⁸ Іра, сын Ікеша, Тэкаіцянін; Эвіезэр Анатацянін;

²⁹ Сіўхай Хушацянін; Ілай Ахахіянін.

³⁰ Магарай Нэтафатыцянін; Хэлэд, сын Вааны, Хэтафацянін;

³¹ Ітай; сын Рыбая, зь Гівы Веньямінавай: Ванэя Піратанянін:

³² Хурай з Нагалэ-Гааша; Авіел з Аравы;

³³ Азмавэт Бахаруміянін; Эліяхба Шаалбанянін.

³⁴ Сыны Гашэма Гізаніцяніна: Ёнатан, сын Шаге, Гарарыцянін;

³⁵ Ахіям, сын Сахара, Гарарыцянін; Эліфал, сын Уры;

³⁶ Хэфэр з Махэры; Ахія Пэланіцянін;

³⁷ Хэцрой Кармэліцянін; Наарай, сын Эзбая;

³⁸ Ёіл, брат Натана; Міўхар, сын Гагрыя;

³⁹ Цэлэк Аманіцянін; Нахарай Бэрацянін, збраяносец Ёава, сына Саруі;

⁴⁰ Іра Ітрыянін; Гарэб Ерыянін;

⁴¹ Урыя Хэтэянін;

⁴² Адына, сын Шызы, Рувімлянін, узначалец Рувімлянаў, і ў яго, было трыццаць;

⁴³ Ханан, сын Маахі; Ёсафат Мітніянін;

⁴⁴ Узія Аштэрацянін; Шама Еэл, сыны Хатама Араэраніна;

⁴⁵ Едэяэл, сын Шымрыя, і Ёха, брат ягоны, Тыціянін;

⁴⁶ Эліел з Махавіма, і Ерывай і Ёшавія, сыны Элнаама, і Ітма, Маавіцянін;

⁴⁷ Эліел, Авэд і Ясіел з Мэцаваі.